DILI, 04 Marsu 2025
Sua Exelénsia Ministra edukasaun Dra. Dulce de Jesus Soares hamutuk ho funsionáriu tomak iha Ministériu Edukasaun, presta omenajen ikus ba maktoban António de Jesus Lay (ATAKU), hanesan funsionáriu Ministériu Edukasaun nian, ne’ebé hakotu iss, hafoin hetan asidente iha Munisípiu Liquiça.
Iha homenjen ne’e, Sua Exelénsia Ministra Edukasaun Dra. Dulce de Jesus Soares hateten, ohin loron ho laran triste Ministériu Edukasaun tenki simu funsionáriu ne’e nia mate-isin, tanba hetan asidente iha munisípiu Liquiça.
“ Maktoban Antonio de Jesus Lay mak funsionáriu ida ne’ebé di’ak tebe-tebes iha servisu, tanba ne’e ami sente lakon no triste, maibe husu atu ba ho hakmatek no sai anju ba ami atu nune’e bele hala’o servisu ho di’ak”, dehan S. E. Ministra.
Governante ne’e akresenta, maktoban nia kontribuisaun hotu ba Ministériu Edukasaun mak sei hakerek iha istoria ministériu nian atu bele sai exemplar ba funsionáriu ida bainhira halo servisu.
Iha fatin hanesan, reprezentante Familia Sr. Eugénio Sarmento hato’o agradesimentu profundu ba Ministériu Edukasaun nia apoiu tomak no iha servisu fatin maka hahalok ruma maktoban halo sala husu atu bele perdua, tanba ohin alin la hamutuk ona família no Ministériu Edukasaun.
Enkuantu, Maktoban António de Jesus Lay moris iha loron 15 fulan Setembru tinan 1995 no hakotu-nia pregrinasaun iha mundu, bainhira hetan asidente iha munisípiu Liquiça iha loron 02 fulan Marsu 2025.
#MédiaME
