Dili – Loron Sexta-Feira, 28 fevereiru 2025
Sua Exelénsia Ministra Edukasaun Dra. Dulce de Jesus Soares hamutuk ho Sua Exelénsia Sekretária Estadu ba Igualidade, Sra. Elvina Sousa Carvalho no Prezidente INDDICA Sra. Dinorah Granadeiro, realiza komunikadu imprensa hodi espresa ba públiku katak, sei la tolera asaun asédiu sexuál ne’ebé komete husi manorin sira iha eskola no sei fó suspensaun imediata ba autór refere. Komunikadu Imprensa ne’e realiza iha Sala VIP Ministériu Edukasaun, Vila-Verde.
Iha komunikadu ne’e Sua Exelénsia Ministra Edukasaun Dra. Dulce de Jesus Soares, hateten, Ministériu Edukasaun la tolera asaun asédiu sexuál ne’ebé mak komete husi manorin iha eskola no kondena manorin ne’ebé mak komete asaun ne’e hodi loke prosesu disiplinár atu autór bele responsável ba nia asaun refere.
“Bainhira ami rona informasaun ida ne’e imediatamente ha’u hato’o intrusaun ba inspesaun jerál no mós ba inpetór iha área eskola refere, hodi halo kedas levantamentu informasaun prelimináriu no informasaun ne’e ami haruka kedas ba Komisaun Funsaun Públika hodi husu atu loke prosesu disiplinár ba iha asaun ne’e”, dehan S.E. Ministra Edukasaun.
Governante ne’e hatutan, hanesan Ministra Edukasaun kondena atetude ne’ebé mak halo husi pesoál Ministériu Edukasaun, tanba knar ida Ministériu Edukasaun nia mak, la’os de’it hanorin ema sai matenek, maibé hanorin mós étika, morál no responsabilidade iha komunidade, ho situasaun ida ne’e, reitera fali ba públiku katak, Ministeriu Edukasaun foti responsabilidade ida ne’e atu garante katak espasu edukativu, sai espasu ida ne’ebé seguru, nune’e bele hala’o prosesu aprendizajen ho di’ak.
Iha fatin hanesan, Sua Exelénsia Sekretária Estadu ba Igualidade, Sra. Elvina Sousa Carvalho, hateten, Sekretária Estadu Igualidade kondena maka’as aktu ne’ebé mak komete husi manorin, funsionáriu públiku ka sese de’it mak bainhira komete aktu asédiu sexuál, tanba sei lori impaktu negativu ba vítima sira trauma, ta’uk no halo vítima sira izola-an ne’ebé sei lori tempu naruk.
“Asédiu sexuál ne’ebé mak akontese iha eskola ka iha ne’ebé de’it, ita labele permiti, tanba eskola sai hanesan fatin ne’ebé mak seguru ba labarik sira atu aprende no sei nafatin akompaña vítima sira no prosesu ne’e to’o nia rohan”, dehan S.E. SEI.
Governante ne’e hatutan, Sekretária Estadu Igualidade husu atu halo suspensaun imediatu ba profesór ne’ebé mak halo asaun ne’e hodi hein investigasaun. Tanba ne’e enkoraza labarik sira hotu feto no mane ne’ebé mak hetan aktus husi sese de’it tenki ko’alia sai no brani ko’alia sai.
Aleinde ne’e Prezidente INDDICA, Sra. Dinorah Granadeiro, hateten, parte INDDICA kondena tebes asaun ne’ebé mak komete husi manorin-na’in, tanba tuir loloos nia mak sai hanesan protetór no edukadór ne’ebé mak eduka estudante sira atu hasoru prosesu aprendizajen ne’e ho di’ak, maibé nia mak sai fali autór ne’ebé mak hanesan ka habadak labarik sira-nia dalan.
“Agora dadauk ne’e INDDICA nia ekipa iha hela terenu hodi buka hela informasaun kona-ba situasaun ne’ebé akontese no ami prontu kualker tempu ba alin sira ne’ebé mak hasoru violénsia inklui asédiu sexuál, favór korajen atu hato’o keixa no ami hakribi asaun ne’ebé halo husi manorin-na’in, no sei hamutuk ho Ministériu Edukasaun no Sekretária Estadu ba Igualidade hodi foti asaun ne’ebé mak maka’as ba autór refere”, dehan Prezidente INDDICA.
Prezidente INDDICA hatutan, to’o ona tempu atu labarik sira livre husi violénsia iha prosesu hotu, la’os de’it iha área edukasaun, maibé iha situasaun hotu, tanba ne’e mak INDDICA prontu iha kualker tempu atu kontinua fó asisténsia bainhira alin-oan sira presiza.
#MédiaME
