DILI, 05 MARSU 2025
Sua Exelénsia Ministra edukasaun Dra. Dulce de Jesus Soares ho Membru IX Governu Konstituisionál hamutuk ho Dra. Najat Maalla M’Jid (SRSG-VAC) halo lansamentu ba Timor-Leste nia adezaun iha Pathfinding Global Alliance hodi Hakotu Violensia Hasoru Labarik (HVHL) iha Auditorium Kay Rala Xanana Ministériu Finansas.
Iha diskursu, S.E. Vice – PM II, MCAS no Ministru ba Dezenvolvimentu Rurál no Habitasaun Komunitaria, Eng. Mariano ASSANAMI Sabino hateten, ohin mai iha ne’e atu hatudu Estadu Timor-Leste nia komitmentu ba mundu hodi tama ba Aliansa Mundial ida ne’ebé maka iha kompromitidu atu labele iha violénsia hasoru labarik sira.
“ Oan sira ne’ebé iha ne’e no sira ne’ebé la mai maibe bainhira imi rona mensajen ida ne’e importante ba imi hotu katak ami hotu iha ne’e kompromitidu atu labele halo tan violénsia hasoru imi” Dehan S.E. Vice-PM II.
Iha fatin hanesan, Sua Exelénsia Ministra edukasaun Dra. Dulce de Jesus Soares reforsa, desde Timor-Leste hetan ninia independénsia sempre fó importánsia boot ba iha asuntu violénsia kontra labarik maske ministériu edukasaun sei enfrenta problema boot tebes-tebes iha asuntu ida ne’e maibe liuhusi servisu hamutuk sei kontinua lori programa ne’e ba oin.
Enkuantu iha atividade ne’e halo mós diseminasaun promesa Timor-Leste nian, enkuadramentu hametin sistema protesaun labarik no Workshop Vizaun hodi dezenvolve planu asaun kona-ba hakotu violénsia hasoru labarik sira.
#MÉDIAME
