Chiang Rai, 20 juñu 2024
Ministériu Edukasaun reprezenta husi koordenadór GADCRP Sr. João Mau Pelu no Asesór ME Sr. Pedro Ribeiro Gonçalves partisipa iha workshop ba ofisiais edukasaun ASEAN nian kona-ba Sufficiency Economy Philosophy for Education (SEP-ED) iha Chiang Rai, Tailândia, husi loron 18 to’o 21 juñu.
Workshop SEP-ED ne’e organiza husi SEAMEO SEPS no kolabora hamutuk ho Komisaun Nasionál Tailândia nian ba UNESCO no Ministériu Edukasaun Tailândia nian hanesan parte ida husi esforsu atu aselera implementasaun husi Objetivu Dezenvolvimentu Sustentável (ODS). Workshop refere foka liu ba Tailândia nia Sufficiency Economy Philosophy (SEP) hanesan estrutura ida ba sustentabilidade iha edukasaun. Ninia objetivu atu haklean kompreensaun kona-ba SEP entre ofisiais edukasaun nian husi nasaun oioin no promove ninia aplikasaun liuhusi abordajen ne’ebé involve komunidade eskolár hotu.
Workshop refere inklui mós espertu sira husi SEP no vizita ba Chiang Rai Learning Centre, Mae Salong (Projetu Haigh Land) no Eskola Parseira (Eskola Ratchpattana), Projetu Dezenvolvimentu Doi Tung nomós Eskola Rajaprajanugroh 15, hanesan modelu susesu SEPS nian ho objetivu atu hamosu diskusaun kona-ba SEPS no abordajen sira seluk kona-ba sustentabilidade.
#MédiaME
