Viqueque, 24/06/2024
Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos, hamutuk ho Prezidente Komisaun Funsaun Públika Sr. Agustinho Letêncio de Deus no dirijente sira husi Ministériu Edukasaun nian fó pose ba manorin-na’in engresu espesiál rejime kareira dosente na'in 274, iha Munisípiu Viqueque segunda-feira ne'e.
Iha Diskursu Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos hateten, tomada pose ba profesór kareira dosente nian ne'e espesiál, reprezenta kapítulu foun ida iha vida profisionál sira nian, no avansu prometedór ida iha dezenvolvimentu edukasaun iha rejiaun ne’e.
“Hanesan profesór, ita iha responsabilidade atu forma ema nia hanoin, inspira ema nia laran no nutre potensiál ilimitadu husi estudante ida-idak. Ita iha responsabilidade atu kria ambiente aprendizajen ida-ne'ebé seguru, inkluzivu no estimulante, ne'ebé respeitu malu no dezeju ba koñesimentu sai boot iha ita-nia estudante hotu-hotu nian”,tenik Exelénsia ne’e.
Governante ne’e reafirma, Ministériu Edukasaun, fiar katak manorin sira halo knaar ho profisionalismu no dedikasaun másimu. Ministériu Edukasaun apoia másimu professor, sei servisu hamutuk atu kria ambiente aprendizajen ida-ne'ebé propísia ba kresimentu no dezenvolvimentu husi estudante hotu-hotu.
Fatin hanesan Prezidente Komisaun Funsaun Públika Sr. Agustinho Letêncio de Deus deklara,servisu ida ne’e Ministériu Edukasaun no Funsaun Públika, nu'udar esforsu bo'ot ida atu hakotu Profesor voltariu sira iha teritoriu laran tomak, esforsu ida ne’e todan, maibé ohin loron bele realiza duni.
“Parabens ba imi hotu, ohin loron imi bele sai ona Profesór ingresu espesiál iha Munisípiu Viqueque, sai funsionariu publiku la'ós priviléjiu ba imi, sai responsabilidade boot ba ita-boot sira, hanesan profesór atu Viqueque oan matenek iha futuru iha ita-boot sira nia liman
kareira profesor ne'e vokasaun. Tenki tau an hanesan profesór iha soseidade nia laran, dedika-an ba, ita-boot sira nia kareira, asumi kargu ne'e didi'ak. sai nafatin ezemplu di'ak iha estudante sira nia oin liu-liu husi Viqueque”, katak Prezidente Komisaun Funsaun Públika.
Enkuantu serimónia ne’e partisipa husi Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos, hamutuk ho Prezidente Komisaun Funsaun Públika Sr. Agustinho Letêncio de Deus no dirijente sira husi Ministériu Edukasaun, Prezidente Autoridade Munisípiu Viqueque, Diretor Edukasaun Munisípiu Viqueque, Komandante PNTL Munisípiu Viqueque, Kordenador 12 de Novembru Munisípiu Viqueque no Familia sira.
#MediaME
