Dili, 04/12/2024 - Sua Exelénsia Ministru Edukasaun Interinu Sr. Domingos Lopes Lemos partisipa iha reuniaun Konsellu Ministru ne’ebé lidera husi Sua Exelénsia Primeiru Ministru Kay Rala Xanana Gusmão iha Palasiu Governu Kuarta-feira ne’e.
Sorumutu iha Palásiu Governu aprova projetu Proposta Lei, ne’ebé aprezenta husi Ministru Justisa, Sérgio de Jesus Fernandes da Costa Hornai, no husi Koordenadora Grupu Traballu ba Reforma Setór Justisa, Lúcia Lobato, kona-ba alterasaun Dahuluk ba Lei n. 1/2017, loron 18 fulan-janeiru, Rejime Tranzitóriu Rekrutamentu Majistradu no Defensór Públiku sira ne’ebé la’ós timoroan no alterasaun daruak ba Lei n. 9/2011, loron 17 fulan-agostu, ne’ebé aprova orgánika Kámara Kontas Tribunál Superiór Administrativu, Fiskál no Kontas nian.
Ministru Juventude, Desportu, Arte no Kultura, Nelyo Isaac Sarmento, aprezenta ba Konsellu Ministrus relatóriu kona-ba partisipasaun iha Konferénsia Ministrus Juventude no Desportu Komunidade País Lian Portugés (CPLP, Sigla iha Lian Portugés) nian ba da-15, ne’ebé hala’o iha Cascais, Portugál , husi loron 12 to’o 16 fulan-novembru.
Konsellu Ministrus aprova projetu rezolusaun ne’ebé kria Komisaun Eventuál Interministeriál ne’ebé responsavel ba koordenasaun atividade sira relasiona ho realizasaun Konferénsia Ministrus Juventude no Desportu CPLP nian ba da-16 no Jogu Desportu CPLP nian ba da-12, ne’ebé sei hala’o iha Dili, hahú hosi loron 17 to'o loron 27 fulan-jullu tinan 2025.
Konsellu Ministru delibera hodi fó naran ba ponte foun Comoro Mota Ulun (Casnafar) ho naran Kofi Annan, Eis Sekretáriu-Jerál Nasoens Unidas.
Konsellu Ministru aprova indikasaun ba naran sira ne’ebé sei nomeia husi Ministru Transportes no Komunikasoins, Miguel Marques Gonçalves Manetelu, ba Konsellu Administrasaun Autoridade Nasionál Komunikasoins (ANC, sigla iha lian portugés) nian.
Ikus liu, Vise-Ministra ba Asuntus ASEAN, Milena Maria da Costa Rangel, aprezenta ba Konsellu Ministrus atualizasaun kona-ba prosesu adezaun Timor-Leste nu’udar membru plenu ba Asosiasaun Nasoins Sudeste Aziátiku (ASEAN), ne’ebé nia konkretizasaun prevee ona ba tinan oin mai.
#MédiaME
