Dili – Loron Sexta-feira, 28 fevereiru 2025
Sua Exelénsia Ministra Edukasaun, Dra. Dulce de Jesus Soares, partisipa iha lansamentu ofisiál planu estratéjiku 2025-2029 no website Ministériu Planeamentu no Investimentu Estratéjiku, ne’ebé marka pasu importante ida iha jornada dezenvolvimentu sustentável no inkluzivu. Lansamentu ne’e raliza iha Salaun Ministériu Finansas Aitarak-Laran.
Iha diskursu, Sua Exelénsia Ministru Planeamentu no Investimentu Estratéjik, Eng. Gastão Francisco de Sousa, hateten, planu estratéjiku ne’e nu’udar planu dahuluk ne’ebé mak MPIE elabora hodi reprezenta nia kompromisu iha dezenvolvimentu setór infraestrutura no dezenvolvimentu institusionál, ho objetivu atu konduz kresimentu sósiu-ekonómiku transformativu no hadi’a kualidade moris sidadaun hotu-hotu.
“Panorama globál hatudu mudansa ida ne’ebé lalais tebes, tanba ne’e mak importante tebes atu elabora planu estratéjiku, nu’udar dokumentu estratéjiku ida hodi guia ministériu atu responde ba demanda dezenvolvimentu no mós mitigasaun ba risku, liuliu atu orienta governu hodi responde ba tendénsia globál no situasaun inserteza iha futuru ho rezilénsia no estratézika”, dehan Ministru Gastão Francisco de Sousa.
Governante ne’e hatutan, Vizaun MPIE hatúr bazeia ba vizaun globál husi planu estratéjiku dezenvolvimentu 2011-2030 no énfaze importánsia ba planu estratéjiku ne’ebé mak ajuza hatúr vizaun ida klaru no estratejia sira adekuadu atu bele guia implementasaun programa sira hodi responde ba dezafiu dezenvolvimentu nasionál no globál inklui mós kapitaliza oportunidade sira hodi mitiga risku husi impaktu globál hanesan polítika no mudansa klimátika
Ministériu mós lansa website ofisiál ne’ebé mak re-dezeña ona bazeia ba nesesidade ministériu nian no serví hanesan portál hodi atualiza no sosializa informasaun kona-ba ministériu nia atividade no eventu sira ne’ebé mak realiza iha nível rejionál, nasionál no internasionál inklui publikasaun sira mak MPIE dezenvolve hanesan lei sira, polítika no estudu sira.
#MédiaME
