Suai – Loron Domingu, 09 Juñu 2024
Sua Exelénsia Ministra Edukasaun Dra. Dulce de Jesus Soares hamutuk no Sua Exelénsia Ministra Solidaridade Social no Inkluzaun Dra. Verónica das Dores hala’o vizita bá komunidade Suai Loro ne’ebé afetadu ba dezastre naturais ka inundasaun ne’ebé dadaun ne’e evakua hela iha Eskola Sekundária Jerál Públiku (ESGP) Suai.
Iha entrevista S.E. Ministra Edukasaun Dulce de Jesus Soares hateten, ohin halo observasaun iha terrenu hodi haree uma komunidade sira-nian ne’ebé hetan inundasaun no nota katak komunidade sira prontu atu bele fila ba sira-nia fatin ona.
“Ohin lokraik Ministériu Edukasaun nafatin servisu hamutuk ho autoridade munisípiu hodi halo distribuisaun ba materiál didátiku sira hanesan livru aprendizajen nian no mós lori biblioteka móvel hodi hamaluk sira iha prosesu aprendizajen, mezmu aprendizajen normál labele la’o, maibé liuhusi biblioteka móvel labarik sira nafatin aprende literasia no mós uza maneira barak atu halo sira haksolok nafatin”, dehan S.E. Ministra Edukasaun.
Governante ne’e hatutan, biblioteka móvel ne’e mós sai programa ida Ministériu Edukasaun nian no ba oin sei kontinua lori to’o iha área sira ne’ebé la iha asesu ba Pré-Eskolár no ohin lokraik anima tebe-tebes oan sira ne’ebé mak sofre durante hetan dezastre naturais ida-ne’e.
Iha fatin hanesan S.E. Ministra Solidaridade Social no Inkluzaun Dra. Verónica das Dores hateten, ohin mai vizita komunidade sira ne’ebé vítima ba dezastre naturais hodi haree direta situasaun ne’ebé sira enfrenta no fahe mós ai-han komplementár balun sira hodi responde ba nesesidade urjénsia.
“Fós la lori mai iha ne’e, maibé kuandu família sira ne’e fila pesoál sira iha solidariedade sosiál munisipál sei tula tuir ba kada uma tuir lista ne’ebé rekolla ona”, dehan S.E. Ministra.
Enkuantu atividade sosiál ne’e hola parte mós parte relevante sira hanesan Ministériu Edukasaun, Ministériu Solidaridade Social no Inkluzaun, Ministériu Saúde, Autoridade Munisípiu, Cruz Vermelha Timor-Leste, Bombeiros, UNICEF, Autoridade Protesaun Sivil, PNTL no mós autoridade relevante sira seluk.
#MédiaME
