Suai – Loron Segunda-feira, 10 Juñu 2024
Sua Exelénsia Ministra Edukasaun Dra. Dulce de Jesus Soares hamutuk ho Sua Exelénsia Ministra Solidaridade Social no Inkluzaun Dra. Verónica das Dores hala’o vizita kortezia bá Eskola Sekundáriu Jerál Públika Seran kote Suai Vila hodi fó mensajen ba estudante sira atu mantein disiplina no haka’as-an estuda nafatin atu bele sai ezemplu di’ak iha sosiedade.
Iha vizita ne’e S.E. Ministra Edukasaun Dra. Dulce de Jesus Soares hateten, estudante ensinu sekundáriu ne’e joven ona, tanba tinan 15 ba leten ona, maibé dalabarak la atensaun ho did’ak mak bele lori ba buat ne’ebé ladi’ak, tanba ne’e mak estudante nia responsabilidade mak estuda hodi bele sai futuru ba nasaun ida-ne’e nian.
“Se imi sira ne’e mak sai ajente ne’ebé mak atu haklaken kona-ba labele soe fo’er arbiru karik sei ajuda inundasaun iha ita-nia rai Suai ne’e hamenus oituan, karik bele halo ezersísiu ida kona-ba oinsá inundasaun ne’e mosu? No saida mak halo? No mós asaun saida mak hanesan joven halo hodi halakon inundasaun ne’e rasik”, dehan S.E. Ministra Edukasuan.
Governante ne’e husu mós ba manorin sira atu fó atensaun ba estudante sira ne’ebé sikat de’it kadernu iha bolsu ne’e modelu ida ne’ebé tenke hapara, tanba ne’e sé mak halo hanesan ne’e haruka nia fila no labele tama iha eskola Serankotek.
Iha fatin hanesan S.E. Ministra Solidaridade Social no Inkluzaun Dra. Verónica das Dores hateten, estudante sira tenke respeita inan-aman sira no mai eskola ho loloos, tanba rai ida-ne’e ema rihun ba rihun mak mate no balun hakoi moris, tanba ne’e husu atu estuda no aprende didi’ak hodi lori rai ida-ne’e bá oin.
“Ami ko’alia ba imi hanesan inan ida hodi husu ba imi tenke hatene istória nasaun ne’e nian ne’ebé harii ho ruin no ran, tanba ne’e respeita inan-aman sira no badinas estuda, nune’e sai ema ne’ebé matenek hodi ukun fali rai ne’e iha futuru, dehan S.E. Ministra.
Hafoin remata tiha vizita iha ESGP Serankotek, kontinua halo vizita bá Ensinu Báziku Sentrál Suai Loro no Ensinu Báziku Sentrál Beco hodi vizita estudante sira inklui fahe ekipamentu balun ba eskola sira hodi fasilita sira-nia atividade iha eskola.
#MédiaME
