Ermera – Tersa-Feira, 24 Juñu 2024
Sua Exelénsia Ministra Edukasaun Dra. Dulce de Jesus Soares, hala’o vizita kortezia ba Ensinu Báziku Sentrál (EBC) Tatamailau Katrai-Leten hodi haree no observa direta kondisaun sala aula no biblioteka iha eskola refere.
Iha vizita ne’e S.E. Ministra Edukasaun Dra. Dulce de Jesus Soares husu ba manorin sira atu kontinua mantein disiplina hodi hanorin estudante sira, liu-liu fahe livru sira ne’ebé eskola iha ba estudante sira nomós halo traballu oin-oin atu bele hasa’e liután estudante sira-nia koñesimentu.
“Livru sira ne’ebé iha biblioteka ne’e fahe ba estudante sira, labele rai de’it to’o livru sira ne’e la uza no fó impresta hodi oan-sira lori ba uma, maibé kria regra sira atu nune’e labele estraga, atu bele apoiu oan sira-nia dezenvolvimentu nomós bele hetan apoiu máximu husi inan-aman iha uma”, dehan Ministra Edukasaun.
Hafoin remata vizita ba EBC Tatamailau Katrai-Leten, S.E. Ministra Edukasaun Dra. Dulce de Jesus Soares kontinua kedas ba iha Eskola Ensinu Sekundáriu Tékniku Vokasionál Dr. José Ramos-Horta Calbale-Lauana hodi akompaña Prezidente Repúblika Dr. José Ramos-Horta hodi halo diálogu ho komunidade inklui fahe ai-han nesesidade báziku ba komunidade kbi’it laek sira.
#MédiaME
