Bobonaro, 05 Dezembro 2024
Ministériu Edukasaun liuhusi Diresaun Nasional Edukasaun Pré-Eskolár (DNEPE) ho nia fasilitadora Sra. Bebiana Caldas ho ekipa fó formasaun ba inan-aman sira kona-ba programa intensivu durante loron rua (2) iha Aldeia Leber-Taz, Suku Leber, Postu Adminitrativu Bobonaro no partisipa husi autoridade lokál iha suku ne’e.
Iha formasaun ba inan-aman ne’e, fasilitadora ba iha programa intensivu Sra. Bebiana Caldas hateten programa ne’e husi IX Governu Kontituisional ho nia objetivu atu bele fasilita labarik ki'ik-oan sira iha Pré-Eskolár no liliu ba labarik ne’ebé husi tinan lima (5), mai kraik ka labarik sira ne’ebé agora dadaun abandona hela eskola.
“Ami prepara labarik sira husi tinan lima ba leten atu nune’e sira bele hetan abilidade fíziku, komitivu, língua no sósio-emosionál husi ne’e hodi tulun labarik sira atu bele hetan edukasaun ne’ebé sufisiente hodi bele preparadu ba iha eskola Ensinu Báziku”. Dehan fasilitadora ne’e iha suku Leber.
Iha fatin hanesan reprezentante autoridade suku Leber informa ba jornalista katak programa intensivu ne’e di’ak tebes ba inan-aman tanba bele aumenta ka kapasita sira-nia oan nia koñesimentu nune’e hodi prepara labarik sira ba tama iha eskola primária no liuhusi programa intensivu ida ne’e labarik aprende di’ak liután.
“Ha’u hanesan autoridade lokál nia haree bainhira ami nia oan sira seidauk tama iha programa intensivu ne’e sira la iha koñesementu kona-ba kores, alfabetu, númeru maibé sira tama ona iha programa intensivu ne’e sira hatene saida mak kores mean, alfabetu no númeru sira ”. dehan autoridade lokál ne’e
Autoridade lokál husu ba Ministériu Edukasaun ba futuru nafatin loke programa intensivu ne’e tanba bele aumenta labarik sira-nia kapasidade no ba oin sei di’ak liután, nu’udar autoridade sei organiza inan-aman atu nune’e sira nia oan bele mai aprende di’ak liután. Se bainhira Ministériu Edukasaun hapara programa refere iha tinan 2025, hanesan komunidade sente triste tebes.
Iha abertura programa intensivu ne’e marka prenzensa másimu husi fasilitador/a husi Diresaun Nasional Edukasaun Pré-Eskolár (DNEPE) hodi fó formasaun ba inan-aman sira kona-ba programa intensivu durante loron rua (2) iha Aldeia Leber-Taz, Suku Leber, postu adminitrativu Bobonaro no partisipa husi autoridade lokál iha suku ne’e no inan-aman.
#MédiaME
#JornalistaSiga
