Covalima – Loron, Sexta-Feira, 24 Janeiru 2025
Sua Exelénsia Ministra Edukasaun Dra. Dulce de Jesus Soares no Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos hamutuk ho dirijente Ministériu Edukasaun nian no profesór sira hotu husi Ensinu Pré-Eskolár to’o iha Ensinu Sekundáriu Jerál no Ensinu Sekundáriu Tékniku Vokasionál iha Munisípiu Covalima nian, hodi fahe rezultadu ne’ebé alkansa ona no dezafiu sira ne’ebé infrenta durante tinan 2024, no divulga planu asaun anuál no orsamentu Ministériu Edukasaun ba tinan 2025, Munisípiu Covalima.
Iha dikursu, Sua Exelénsia Ministra Edukasaun Dra. Dulce de Jesus Soares hateten, atu atinji rezultadu di’ak liu iha 2025, di’ak liu uza estratéjia ne’ebé inklui vizita estudu ba eskola sira, no mós aumenta oportunidade formasaun profisionál ba manorin no dirijente eskolár sira, liuliu iha nível nasionál no internasionál atu iha komitementu hodi asegura oportunidade formasaun ne’ebé ekuitativu, no mós halo intervensaun sira hotu ne’ebé asegura katak estudante sira bele aprende.
“Ministériu Edukasaun nia forsa mak profesór sira, tanba ne’e Ministériu Edukasaun sei hamutuk ho profesór sira atu lori edukasaun ba oin. Ema barak ko'alia barak, maibé lahatene sakrifísiu profesór ida nian, tanba profesór de’it mak bele halo sakrifísiu hodi hanorin povu Timor nia oan”, bodik Ministra Edukasaun.
Iha fatin hanesan Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos hateten, eventu ida ne’e importante teb-tebes, tanba bele mai hamutuk ho Profesór sira atu fó hanoin ba malu kona-ba progresu servisu ne'ebé halo ona no planu programa Ministériu Edukasaun nian iha tinan 2025.
"Husi Enkontru ida ne’e ita bele fó hanoin malu objetivu saida mak ita atu alkansa iha prosesu ida ne’e, husu Diretór Edukasaun Munisípiu Covalima ho Dirijente no Profesór sira presiza halo liña kordenasaun servisu ba malu, husu mós ba Profesór Ensinu Sekundáriu tékniku-vokasionál sira presiza hala'o jestaun di'ak ba ekipamentu sira ne'ebé mak iha, hatudu étika ne'ebé di'ak durante prosesu aprendizajen", Dehan S.E. ESJ no ESTV
Molok hahú atividade ne’e, Sua Exelénsia Ministra Edukasaun Dra. Dulce de Jesus Soares ho dirijente sira Ministériu Edukasaun partisipa iha misa agradesimentu ba serimónia refere hamutuk ho manorin sira, iha igreja Ave Maria Suai, Covalima.
#MédiaME
