Dili – Loron, kuarta-feira, 04 setembru 2024
Sua Exelénsia Ministra Edukasaun Dra. Dulce de Jesus Soares hamutuk ho Sua Exelénsia Primeiru Ministru Kay Rala Xanana Gusmão, Sua Exelénsia Embaixadora Boa Vontade ba Asuntu Edukasaun, Dra. Kirsty Sword Gusmão no Sr. Naldo Rei, halo lansamentu ba livru ho títulu “Ili Matar” kona-ba istória biográfiku Nino Konis Santana, hodi sai hanesan ezemplu testu fiksaun istóriku, atu dada labarik sira-nia atensaun, sentimentu imajinasaun ba eventu istóriku sira iha Timor-Leste durante luta libertasaun, iha Sala Leitura Xanana Gusmão.
Iha intervensaun, Sua Exelénsia Primeiru Ministru Kay Rala Xanana Gusmão, hateten lansamentu livru ida ne’e ba estudante sira atu lee, buka aprende, buka kompriende no lalika moe atu diskuti ho ema seluk, tanba ne’e aprendizajen, ne’e duni mai atu fó apoiu ba inisiativu ida ne’ebé furak tebe-tebes no mós atu ko’alia ba joven sira katak, matenek la okupa fatin, tanba ne’e lansa livru ida ne’e ba joven hotu-hotu.
“Ministra Edukasaun, hato’o tiha ona kurríkulu foun, maibé hadi’a uituan, nune’e imi tenke estuda, tanba imi mak sei kaer fali rai ne’e, ho nune’e, mak kurríkulu ne’ebé aprova tiha ona bele fó ba imi kbi’it boot liu hodi bele sai matenek liu ami ho hanoin ne’ebé luan”, dehan S.E. PM.
Primeiru Ministru hatutan, estudante sira tenke lee, lee no lee, atu oinsá mak iha kbi’it hodi hanoin, hodi diskute, tanba ne’e presiza lee no kontinua aprende tan buat seluk atu imi-nia hanoin bele luan liután.
Iha fatin hanesan, Sua Exelénsia Ministra Edukasaun Dra. Dulce de Jesus Soares, hateten, ohin halo lansamentu ba livru ho títulu “Ili Matar”, ne’ebé mak konta istória luta nian no istória kona-ba Saudozu Komandante Nino Konis Santana, livru ida ne’e importante tebes ba Ministériu Edukasaun atu bele enrikese kurríkulu no mós liuhusi livru ida-ne’e bele lori istória Timor-Leste nian ba ema seluk.
“Ministériu Edukasaun apresia tebetebes no kontinua konvida autór sira hodi hakerek livru, nune’e, estudante sira bele uza hanesan referénsia iha matéria istória, no mós buka kontinua halo tradusaun ba livru sira ne’ebé hakerek tiha ona, maibé sei iha lian seluk atu estudante sira bele aprende ho di’ak liután”, dehan S.E. Ministra Edukasaun.
Governante ne’e hatutan, livru ne’e sei ba liu ensinu báziku síklu daruak no datoluk, maibé livru ne’e ko’alia kona-ba istória Saudozu nia luta, la’os de’it ba ensinu báziku, maibé ensinu sekundáriu mós importante atu lee, nune’e, bele koñese liu kona-ba Saudozu Komandante Nino Konis Santana.
Aleinde ne’e Embaixadora Boa Vontade ba Asuntu Edukasaun, Dra. Kirsty Sword Gusmão, hateten, livru ne’ebé ho títulu “Ili Matar”, dezenvolve duni iha kontestu dezenvolvimentu kurríkulu ensinu báziku síklu dahuluk to’o datoluk.
“Ohin ita atu ko’alia kona-ba importánsia istória tempu pasadu nian ne’ebé hatutan mai ita liuhusi livru istória no momentu ne’e ha’u iha previléjiu no ónra boot atu servisu hamutuk ho Ministériu Edukasaun ne’ebé lidera husi Dra. Dulce de Jesus Soares, iha dezenvolvimentu kurríkulu ensinu báziku síklu datoluk no ohin kuadru legál ba kurríkulu foun ne’e hetan ona aprovasaun husi Konsellu Ministru", dehan Embaixadora Boa Vontade.
Embaixadora Boa Vontade ne’e hatutan, kolaborasaun entre Ministériu Edukasaun no parseiru sira iha Áustralia inklui organizasaun Rotary hodi halibur fundu no halibur ema-nia vontade di’ak atu kontribui ba dezenvolvimentu iha nasaun sira hanesan Timor-Leste, liuhusi servisu hamutuk iha projetu ida naran “New Books for a New Nation”, Livru foun ba Nasaun foun, ne’ebé dezenvolve tiha ona livru hamutuk 12 husi projetu ne’e.
Livru ne’e hakerek husi atuál Primeiru Ministru Kay Rala Xanana Gusmão no Dra. Kirsty Sword Gusmão.
#MédiaME
#JornalistaLuis
