Díli – Loron Kuarta-Feira, 04 Setembru 2024
Reuniaun Konsellu Ministru ohin, aprova projetu Dekretu- Lei ne’ebé aprezenta husi Sua Exelénsia Ministra Edukasaun, Dra. Dulce de Jesus Soares, ba aprovasaun Kurríkulu Báziku Nasionál ba Terseiru Siklu Ensinu Báziku nian, ne’ebé abranje husi tinan eskolaridade 7.º, 8.º no 9.º nian.
Kurríkulu ida-ne’e substitui versaun tinan 2011 nian, ho objetivu atu unifika no moderniza ensinu báziku hodi oferese edukasaun ida ho kualidade ne’ebé aliña ho nesesidade sira kontemporánea. Objetivu prinsipál inklui dezenvolvimentu kona-ba koñesimentu sientífiku no linguístiku, aleinde fortalesimentu ba kompeténsia sira hanesan pensamentu analítiku-krítiku, kriatividade, komunikasaun no valorizasaun ba tradisaun kultural sira. Foka-liu introdusaun ba dixiplina “Fraternidade Humana, Morál no Étika”, ne’ebé inspira iha ensinamentu Papa Francisco no Saserdote Musulmanu Al-Azhar nian, ba promosaun páz no konvivénsia armonioza.
Implementasaun hosi kurríkulu ida-ne’e sei promove abordajen inkluziva ida kona-ba diversidade, aleinde introdús elementu sira inovadores hanesan literasia dijitál no moris-di’ak fíziku no mentál. Eskola sira sei iha autonomia hodi adapta kurríkulu tuir karakterístika sira rejionais, naran katak respeita prinsípiu orientadore sira.
Iha intensaun atu alunu sira, bainhira remata síklu ida-ne’e, sira iha ona kapasidade atu partisipa ho ativu iha sosiedade, ho koñesimentu sientífiku sira avansadu, iha tempu hanesan prezerva tradisoens ne’ebé kria identidade timoroan nian no dezenvolve pensamentu ida krítiku hodi rezolve problema no foti desizaun sira ho matenek no responsabilidade.
#MédiaME
