Dili, 04/09/2024
Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos partisipa iha aniversáriu dala ruanulu (20) Eskola Sekundáriu Jerál 4 de Setembru UNAMET Dili, kuarta-feira ne'e.
Iha Intervensaun Sua Exelénsia Sekretáriu Estadu ESJ-ESTV Sr.Domingos Lopes Lemos hateten, loron ida ohin importante tebetebes ba Eskola Sekundáriu Jerál 4 de Setembru UNAMET.
"Loron 4 fulan Setembru 1999 ne'e loron ne'ebé ONU anúnsia rezultadu Konsulta Populár ba mundu katak maioria populasaun la aseita otonomia espesiál, situasaun ida ne'ebé difisil tebes to'o ohin loron ita hetan ukun rasik an. Ha'u husu estudante no Profesór sira atu idak-idak halo reflesaun ba sira-nia an katak sentidu husi 4 de Setembru 1999 ne’e lori rezultadu di'ak", dehan Sua Exelénsia Sekretáriu Estadu ESJ-ESTV.
Governante ne'e hateten tan, maski iha monumentu ne'eba estudante no profesór/a barak mak sei ki'ik la partisipa iha loron importante ne’e, maibé estudante no Profesór sira iha istória atu fanun fila-fali hodi kuda nasionalizmu no patriotizmu nune'e labele haluha istória ne’e.
Komemorasaun loron 20 Eskola Sekundáriu Jerál 4 de setembru UNAMET Dili ne'e partisipa mós husi Diretór Jerál Ensinu Sekundariu Sr. Deolindo da Cruz, Diretór Nasionál Ensinu Sekundáriu Sr. Benjamin Fernandes, Diretór Nasionál Ensinu Tékniku Vokasionál Sr.Fernando Gama profesór/a no estudante sira.
#MédiaME
