Dili – Loron Segunda-Feira, 24 Fevereiru 2025
Sua Exelénsia Ministra Edukasaun Dra. Dulce de Jesus Soares, hala’o enkontru ho Embaixadór Timor-Leste ba Xina, Sr. Loro Horta, hodi ko’alia kona-ba dezenvolvimentu Eskola Sekundáriu Tékniku Vokasionál iha Timor-Leste. Enkontru ne’e hala’o iha Sala VIP Ministériu Edukasaun, Vila-Verde.
Iha Enkontru ne’e, Sua Exelénsia Ministra Edukasaun Dra. Dulce de Jesus Soares, hateten, ohin enkontru ho Embaixadór Timor-Leste ba Xina, hodi ko’alia kona-ba asuntu ida kona-ba oinsá mak Ensinu Sekundáriu Tékniku Vokasionál iha Timor-Leste, tanba nasaun Xina hakarak fó apoiu ba Eskola Ensinu Sekundáriu Tékniku Vokasionál.
“Enkontru ohin tékniku tebe-tebes, atu identifika posibilidade ruma, ne’ebé mak Ministériu Edukasaun bele halo kooperasaun ho Sentru Vokasionál iha Xina”, dehan S.E. Ministra Edukasaun.
Iha fatin hanesan, Embaixadór Timor-Leste ba Xina, Sr. Loro Horta, hateten, ohin ko’alia ho Ministra Edukasaun kona-ba posibilidade kooperasaun ba apoiu iha área Ensinu Tékniku Vokasionál hodi hasa’e liután foinsa’e sira-nia koñesimentu iha área tékniku vokasionál nian.
“Tinan 2025 ne’e, Governu Xineza disponibliza ona bolsa hamutuk 15 iha área tékniku vokasionál ba Timoroan sira, tanba ne’e ohin mai ko’alia ho Ministra Edukasaun hodi haree posibilidade no koordena implementasaun projetu iha área tékniku vokasionál ho Governu Xina”, dehan Embaixadór TL ba Xina.
#MédiaME
