Bobonaru – Tersa-Feira, 25 Juñu 2024
Sua Exelénsia Ministra Edukasaun Dra. Dulce de Jesus Soares, hala’o vizita ba Pré-Eskolár Male-Ubu Bobonaru hodi haree direta kondisaun eskola ne’ebé mak estudante no manorin sira infrenta no hala’o teste direta ba estudante sira iha aula-laran.
Iha entrevista, Sua Exelénsia Ministra Edukasaun Dra. Dulce de Jesus Soares hateten, Pré-Eskolár ne’e presiza tebes atu hadi’a no tama ona ba iha planu infrastrutura Ministériu Edukasaun nian atu konstrui ida tinan 2025, maske sei problema oituan iha rai, maibé hein katak komunidade sira bele deside atu hari’i eskola.
“Durante loron rua ne’e hala’o vizita ba eskola kuaze sanulu (10), maioria husi eskola sira ne’e barak mak ninia konstrusaun di’ak ona, maibé kontinua presiza hadi’a, liu-liu Pré-Eskolár ida ne’e presiza tebe-tebes atu hadi’a, nune’e tau ona iha planu Ministériu Edukasaun atu konstrui iha tinan 2025”, dehan S.E. Ministra Edukasaun.
Governante ne’e hatutuan, kontente tebes, tanba bele hasoru profesór kontratadu sira ne’ebé balun husi Baucau Kelikai, Gariuai no Lautem no profesora na’in tolu (3) ne’e kontente tebes, tanba komunidade sira simu ho kontente tebe-tebes, tanba ne’e iha faze dahuluk ne’ebé liu ona koloka uluk ba área remota sira no iha faze tuir mai sei koloka tan tuir kuadru pesoál ne’ebé iha.
Hafoin vizita tiha Pré-Eskolár Male-Ubu, kontinua hala’o vizita ba Eskola Pré Sekundária Colégio São Miguel Hauba, Ensinu Báziku Sentrál (EBC) Hauba, Ensinu Báziku Sentrál (EBC) Gumer no Ensinu Báziku Sentrál (EBC) Atuaben Maroba, Postu Administrativu Bobonaru.
#MédiaME
