Dili, Segunda-Feira, 27/01/2025
Ministériu Edukasaun liu husi Presidente Instituto Nacional de Formação de Docentes e Profissionais da Educação (INFORDEPE) Domingos Martins hamutuk ho Vise-Prezidente INFORDEPE Domingas Belo Amaral Mendes inklui tékniku sira abertura formasaun literasia bázika no fonétika ba manorin Pre-Eskolár, Parseiru Dezenvolvimentu, no Mentor Lokál sira iha Salaun Ian Martin INFODEPE, Dili
Prezidente INFORDEPE Mestre Domingos Martins iha sesaun abertura hateten, “bazeia ba ita-nia enkontru liga ho planu asaun iha 2025 ita hotu nafatin esforsu ba hadi’ak abilidade literasia iha nível Pré-Eskolár no Ensinu Báziku, tan ne’e, Ministériu Edukasaun liu hosi INFORDEPE hakarak ita hotu atu harmoniza konteúdu iha nível sira ne’e, hodi foka ba abilidade sira ne’ebé labarik sira presiza dezenvolve hodi aprende le’e, inklui fonétika”
“Péritu sira iha area fonétika nian deskobre katak fonétika ajuda labarik sira atu komprende relasaun entre letra no son sira, hodi permite sira atu koñese liafuan foun sira ho efiente”. Dehan Dirijente másimu INFORDEPE.
Prezidente INFORDEPE, haforsa tan katak, Ita tenki hamutuk atu aprende hamutuk hodi fahe ita nia koñesimentu foun sira, liu-liu estratéjia efetivu sira liga ho hasa’e abilidade manorin sira nian, liu husi envolve-an iha atividade literasia nian, atu nune’e iha futuru ita bele observa rezultadu pozitivu hosi imi hotu ne’ebé partisipa formasaun ida ne’e.
Alende ne’e Formadora INFORDEPE Sra. Aurora Assunção Sarmento Quintão hatutan, “formasaun ne’e ho nia objetivu atu haklean koñesimentu ba fasilitador/a parseiru, mentor lokál no nasionál sira hotu kona-ba literásia tetun liu-liu iha area fónetika, tamba agora dadaun dezafiu ne’ebé Ministériu Edukasaun hasoru maka labarik sira barak mak seidauk hatene le’e, entaun molok atu hatene le’e presiza hatene uluk letra ne’e ninia son, liga ho liafuan no fraze sira”
Formasaun ne’e sei la’o durante semana ida, hahú husi loron 27 to’o 31 Janeiru 2025.
Formasaun refere hanesan esforsu hosi Ministériu Edukasaun liu hosi INFORDEPE atu reforsa ita nia manorin sira iha baze hodi hasa’e sira nia abilidade le’e no hakerek iha nível Pré-Eskolár to’o Ensinu Báziku Síklu 1 no 2.
Formasaun ne’e partisipa hosi Manorin, NGO no entidade sira tomak ne’ebé hola parte iha esforsu ida ne’e, hodi hasa’e kualidade ensinu ba ita nia alin oan sira iha Timor-Leste.
#MédiaMEJornalistaEmilio
