Baucau – Loron Kinta-Feira, 30 Janeiru 2025
Sua Exelénsia Ministra Edukasaun Dra. Dulce de Jesus Soares, partisipa iha talkshow kona-ba tinan 100 primeira expedisaun Salezianu iha Timor-Leste, ho tema “Agradecer-Repensar-Relançar”. Objetivu husi talkshow ne’e, atu fó hanoin no informasaun kona-ba ezisténsia Salezianu Dom Bosco no nia kontribuisaun sira kona-ba dezenvolvimentu edukasaun iha Timor-Leste hodi kontribui ba luta luta naruk nasaun ne’e nian, liuhusi kontribuisaun salezianu sira nian. Talkshow ne’e hala’o iha Semináriu São João Bosco Fatumaca, Munisípiu Baucau.
Iha talkshow ne’e, Sua Exelénsia Ministra Edukasaun Dra. Dulce de Jesus Soares, hateten, edukasaun iha salezianu ne’e la’os de’it eduka ema atu sai matenek, maibé hanorin mós étika no morál hanesan sarani katólika.
“Prezensa salezianu nian iha Timor-Leste, kontribui boot tebe-tebes ba ita-nia rai, tanba númeru líder sira husi área oin-oin iha Timor-Leste ne’e barak mak sai husi salezianu, tanba ne’e mak ha’u iha tebe-tebes esperansa no fiar ba São João Bosco katak salezianu sei prontu nafatin atu kontinua kontribui ba rai Timor-Leste liuhusi Edukasaun”, dehan S.E Ministra Edukasaun.
Iha fatin hanesan, Jenerál Reformadu Lere Anan Timur, hanesan mós antigu alunu Salezianu Dom Bosco, hateten, misaun salezianu nian mak prepara ema atu sai ema, tanba karater iha Fatumaca lahanesan ho Liceu no bele dehan katak, ema edukadu, sivilizadu, humilde no respeita tebes ema seluk.
“Ha’u aprende polítika iha Fatumaca, iha momentu ne’ebé Padre ida naran Eduardo ema portugés ida, nia hanesan profesór morál nian, bainhira amu tama aula-laran, nia lako’alia ona kona-ba Moromak nian, maibé ko’alia kona-ba polítika, ko’alia kona-ba demokrasia, independente, liberdade, ko’alia kona-ba esplorasaun husi ema ba ema”, dehan Jenerál Reformadu.
Aliende ne’e Prezidente Komisaun Organizadora, Pe. Manuel da Silva Ximenes, SDB, hateten, iha tinan 3 nia laran ne’e koko atu halibur foinsa’e sira liuhusi atividade diretimentu sira hanesan dansa kultura no atividade desportuvu sira hodi bele forma karater foinsa’e sira-nian.
“Ami nia karizma salezianu nian, bainhira iha jogu mak bele hatene katak sé mak bele pasensia, haraik-an no husi atividade ida mak ami mós bele forma karater labarik no foinsa’e sira-nian no atividade sira seluk ne’ebé atu implementa mak servisu sosiál sira hodi moris hamutuk ho ita-nia komunidade sira iha área rurál sira”, dehan Prezidente Komisaun Organizadora.
#MédiaME
