Dili – Loron Sexta-Feira, 31 Janeiru 2025
Sua Exelénsia Ministra Edukasaun Dra. Dulce de Jesus Soares, akompaña husi Xefe Gabinete Ministra Edukasaun Sra. Paula Corte-Real de Araújo, hala’o enkontru ho Prezidente Parlamentu Nasionál Dra. Fernanda Lay, hodi ko’alia kona-ba preparasaun delegasaun korrida ba paz hamutuk na’in 13 husi nasaun oinoin, ne’ebé iha relasaun ho estatua Sri Chinmoy, ne’ebé koñesidu hanesan Badaen Dame Nian ba Mundu.
Sua Exelénsia Ministra Edukasaun Dra. Dulce de Jesus Soares, hateten, delegasaun sira ne’e sei mai iha loron 4 fulan fevreiru hodi hamutuk ho líder sira, membru governu, estudante no joven sira hodi halo atividade ba loron dahuluk Tocha da Paz nian.
“Delegasaun sira ne’e sei ba halo atividade kona-ba oinsá halo mensajen paz hamutuk ho estudante sira iha munisípiu Likisa, iha eskola 2 no mós eskola 5 iha Munisípiu Dili no estudante sira ne’e sei pinta mensajen paz nian iha kanvaz no iha loron 4 ne’e estudante sira sei kaer kanvaz no Tocha da Paz ne’e hodi la’o fó volta resintu Parlamentu Nasionál depois kontinua vizita ba eskola sira”,dehan S.E. Ministra Edukasaun.
Governante ne’e hatutan, loron 7 sei iha korrida ba paz ho kilo 5, no sei hahú husi estatua Sri Chinmoy no sei la tuir rute ne’ebé mak desidi tiha ona no sei fila-fali mai hodi remata iha Palásiu Governu nia oin.
#MédiaME
