Dili, 22 Janeiru 2025 – Ministériu Edukasaun liuhusi Diretór Jerál Ensinu Pre-Eskolár, Ensinu Báziku no Ensinu Rekorente Sr. Apolinario Serpa Rosa hamutuk ho Diretora Jerál Planu, Polítika, Inkluzaun no informátika Sra. Odilia das Dores Ung Martins no Prezidente INFORDEPE Sr. Domingos Martins hala’o enkontru dahuluk ho Parseiru DIFAT ho PHD hodi ko’alia kona-ba programa ne’ebé durante ne'e servisu hamutuk, iha sala konferensia Ministériu Edukasaun Vila-Verde.
Hafoin enkontru Diretór Jerál Ensinu Pre-Eskolár, Ensinu Báziku no Ensinu Rekorente Sr. Apolinario Serpa Rosa hateten, ohin tur hamutuk hodi halo diskusaun ida kona-ba funsionamentu ekipa pedagójika ne’ebé maka sei akompaña programa ALMA iha munisípiu 14, espesífiku ba munisípiu 3 hanesan Ainaro, Ermera no Oecusse.
“ Diskusaun ohin mós ko’alia kona-ba apoiu fundus ruma husi parseiru sira ligadu ho utilizasaun ICT liu-liu ba tableta ne’ebé durante ne’e mentór sira uza ba iha akompañamentu prosesu aprendizajen iha eskola sira no formasaun ne’ebé ministériu edukasaun atu halo ba profésór ensinu Báziku no Ensinu Sekundáriu sira ligadu ho violénsia doméstika iha eskola sira”, Dehan DGEPEBR.
Diretór Jerál ne’e akresenta, iha tinan 2025 programa ALMA NO EMULI sei kontinua la’o hamutuk ho parseiru DIFAT no PHD ne’ebé hanesan ekipa implementadór hamutuk ho Ministériu Edukasaun iha Baze.
“ Ita-nia mentór sira ne’e tinan kotuk sira tutela ba diresaun ensinu maibe iha tinan 2025 muda no tutela fali ba Instituto Nacional de Formação de Docentes e Profissionais da Educação ka (INFORDEPE)”, tenik DGEPEBR.
Enkuantu iha enkontru ne’e hetan partisipasaun husi Diretór Jerál Ensinu Pre-Eskolár, Ensinu Báziku no Ensinu Rekorente Sr. Apolinario Serpa Rosa, Diretora Jerál Planu, Polítika, Inkluzaun no informátika Sra. Odilia das Dores Ung Martins, Prezidente INFORDEPE Sr. Domingos Martins, Ekipa ALMA no EMULI.
#JornalistaElias
#MÉDIAME
