Dili – Loron Tersa-Feira, 25 Marsu 2025
Ministériu Edukasaun liuhusi Diresaun Rekursu Umanu, hala’o enkontru ho Komisaun Funsaun Públika no Institutu Nasionál Seguransa Sosiál, hodi ko’alia kona-ba reforma manorin-na’in sira ne’ebé ho kondisaun Moras Tempu Naruk (Doença Prolongada) no iha loron 7 fulan abril tinan ne’e, ekipa sei tun ba terrenu hodi sosializa informasaun ligadu ho asuntu ne’e. Enkontru ne’e raliza iha Sala Konferénsia ME, Vila-Verde.
Iha enkontru ne’e Diretór Nasionál Rekursu Umanu, Sr. João Amaral, hateten, ohin ekipa husi Ministériu Edukasaun, Komisaun Funsaun Públika no Institutu Nasionál Seguransa Sosiál, hodi ko’alia kona-ba reforma manorin-na’in sira ne’ebé ho kondisaun Moras Tempu Naruk (Doença Prolongada) no lakle’ur tán sei tun ba terrenu hodi sosializa informasaun ligadu ho asuntu reforma ne’e.
“Ami ekipa husi Ministériu Edukasaun liuhusi Gabinete Rekursu Umanu, Komisaun Funsaun Públika no Institutu Nasionál ba Seguransa Sosiál, ohin hala’o enkontru hodi haree ba dadus moras prolongada ho totál 258, ne’ebé mak verifikadu ona no sei tún ba terrenu hodi sosializa informasaun ba manorin-na’in sira”, dehan Diretór Nasionál Rekursu Umanu.
Dirijente ne’e hatutan, liuhusi enkontru ida ne’e, atu forma ekipa ida hodi tún ba terrenu atu sosializa informasaun sira ne’ebé mak iha no ba sira-nia direitu, sei konta husi hahú sira-nia kontribuisaun husi tinan 2002 mai to’o iha data reforma.
Enkontru ne'e partisipa husi, Porta-Voz Gabinete Ministra Edukasaun, Sr. Filipe Rodrigues Pereira, Diretór Relasaun Públika no Protokolu Ministériu Edukasaun, Sr. Olandino Godinho Cerqueira, Asesora Média Ministériu Edukasaun, Sra. Jacinta Hanjam Corbafo, Ekipa husi Komisaun Funsaun Públika no mós ekipa husi Institutu Nasionál Seguransa Sosiál.
#MédiaME
