𝙈𝙀 𝙍𝙀𝘼𝙇𝙄𝙕𝘼 𝙈𝙄𝙉𝙄-𝙒𝙊𝙍𝙆𝙎𝙃𝙊𝙋 𝙆𝙊𝙉𝘼-𝘽𝘼 𝙋𝘼𝘿𝙍𝘼𝙐𝙉 𝙈Í𝙉𝙄𝙈𝙐 𝘽𝘼 𝙀𝙎𝙆𝙊𝙇𝘼 𝙄𝙉𝙏𝙀𝙍𝙉𝘼𝙎𝙄𝙊𝙉Á𝙇

Dili – Loron Tersa-feira, 25 Marsu 2025

Ministériu Edukasaun liuhusi Gabinete Avaliasaun Lisensiamentu no Akreditasaun (GALA), realiza Mini-Workshop kona-ba proposta padraun adisionál ba Eskola Internasionál sira ne’ebé existe iha Territóriu Timor-Leste, Mini-Workshop ne’e, realiza iha Salaun JL-Vila, Fatuhada.

Iha Mini-Workshop ne’e, Sua Exelénsia Ministra Edukasaun Dra. Dulce de Jesus Soares, hateten, Ministériu iha obrigasaun atu asegura katak eskola hotu-hotu tuir padraun Ministériu Edukasaun nian, inklui eskola privadu no eskola internasionál sira no komprende katak iha eskola privadu oin-oin - balun tuir kurríkulu nasionál, balun tuir kurríkulu seluk. Ba sira ne'ebé tuir kurríkulu diferente, Ministériu nia servisu mak atu asegura katak kurríkulu ne'ebé oferese ba estudante timoroan sira pelumenus hanorin padraun mínimu hanesan kurríkulu.

“Ami fiar katak imi nu'udar eskola internasionál sei oferese tan, maibé ami tenke ezije pelumenus hanesan. Ita mós presiza asegura katak ita-nia estudante sira dezenvolve hanesan sidadaun Timor nian, tanba ne'e rekizitu hanorin istória, kultura no lian Timor nian. Ita-nia estudante sira bele ba Australia ka Filipina ka eskola sira seluk, maibé sira nafatin Timoroan, nune'e ita-nia programa sira presiza aliña ho ita-nia nasaun nia objetivu no valór sira”, dehan ME.

Governante ne’e akresenta, agora daudaun iha sistema lisensiamentu ida-ne'ebé obrigatóriu ba eskola hotu-hotu, no antes eskola foun ida bele loke, eskola ne'e tenke hetan lisensiamentu. Prosesu lisensiamentu ne'e la iha diferensa entre eskola nasionál no internasionál, maibé ezije barak liután husi eskola sira ne'ebé selu taxa aas. Hakarak asegura katak família sira ne'ebé selu osan sei hetan benefísiu ne'ebé sufisiente, tanba ne’e, sira ne'ebé selu taxa aas tenke hatudu katak ita-boot sira fornese akomodasaun adisionál hanesan fatin halimar, fasilidade desportu, no laboratóriu komputadór.

#MédiaME