Dili, 25 Marsu 2025
Ministériu Edukasaun reprezenta husi Diretora Jerál Planu, Polítika, Inkluzivu no Informátika Sra. Odilia das Dores Ung Martins hamutuk ho dirijente sira no Governu Australia halo konsultasaun no diskusaun kona-ba planu no programa prioridade ne'ebé Governu Australia atu apoiu ba Ministériu Edukasaun, iha Hotél Timor, tersa-feira ne'e.

Iha diskusaun Diretora Jerál Planu, Polítika, Inkluzivu no Informátika Sra. Odilia das Dores Ung Martins hateten, objetivu husi atividade ohin loron mak atu haree no halo konsultasaun hamutuk kona-ba planu no programa ne'ebé Governu Australia atu apoiu mai Timor-Leste liu-liu Ministériu Edukasaun ba tinan lima.

"Ita hotu hatene katak durante ne'e Governu Australia apoiu Ministériu Edukasaun liuhusi PHD, nune'e Governu Australia halo hela preparasaun orsamentu ba tinan anuál ninian, tanba ne'e bainhira atu apoiu mai Ministériu Edukasaun presiza halo konsultasaun hodi haree programa prioridade ne'ebé bele tau iha sira-nia planu orsamentu nian", Tenik DJ PPII.

Diretora Jerál ne'e akresenta, Governu Australia sei la apoiu Ministériu ba iha infraestrutura maibé sei apoiu ba iha Ensinu Báziku, Ema ho Difisiénsia, Igualidade Jéneru no Mudansa Klimátika.

"Durante ne'e hahú husi tinan 2016 to'o agora, sira apoiu barak liu ba iha Ensinu Báziku liu-liu suporta ba programa ALMA hodi hala'o servisu hanesan mentoria ba prosesu aprendizajen ho apoiu mós ba edukasaun inkluziva nomós ba atividade sira relavantes atu hetan no presiza tebes apoiu", Dehan DJ PPII.

Nune'e iha atividade konsultasaun ne'e hetan partisipasaun másimu husi Diretora Jerál Planu, Polítika, Inkluzivu no Informátika Sra. Odilia das Dores Ung Martins, Diretór Jerál Edukasaun Pré-Eskolár, Ensinu Báziku no Ensinu Rekorente Sr. Apolinario Serpa Rosa, Prezidente INFORDEPE Sr. Domingos Martins no reprezentante Governu Australia iha Timor-Leste.

#MÉDIAME