Dili, 20 Maiu 2025 – Sua Exelénsia Ministra Edukasaun Dra. Dulce de Jesus Soares, hamutuk ho Membru Governu Konstitusionál Da-9 nian, akompaña Sua Exelénsia Primeiru-Ministru, Kay Rala Xanana Gusmão, hodi partisipa iha serimónia lansamentu fatuk dahuluk ba Dezenvolvimentu no Espansaun Aeroportu Internasionál Prezidente Nicolau Lobato Dili.

Iha diskursu, Sua Exelénsia Ministru Transporte no Komunikasaun, Eng. Miguel Manetelo, hateten, nu’udar ministériu responsavel, hamutuk ho membru sira husi Steering Committee no tékniku sira ne’ebé involve durante ne’e, tau ona iha kuidadu no rigór tékniku husi projetu ida ne’e no asegura nia aliñamentu ho programa no planu estratéjiku Dezenvolvimentu Nasionál nian.

“Seremónia ida ne’e, laos deit inísiu simbóliku ida husi servisu fíziku kona-ba Dezenvolvimentu no Expansaun Aeroportu nian, maibé mós nu’udar momentu kulminasaun husi vizaun estratéjiku, planeamentu estratéjiku, koordenasaun institusionál, inklui ho sentidu brani iha hola desizaun estratéjiku no desizivu iha prosesu tomak to’o nia finalidade”, dehan S.E. Ministru.

Governante ne’e akresenta, maske projetu ida ne’e komplikadu, maibé importante duni ba Timor-Leste, tamba ne’e, rekoñese papél importante ne’ebé dezempeña ona husi komponente hotu-hotu, desde inísiu to’o ohin loron, no fiar katak ho apoiu husi parte-interesada hotu-hotu, ho orientasaun husi Sua Exelénsia Primeiru-Ministru no membru governu sira husi IX Governu Konstitusional nia apoiu, ami sei entrega aeroportu ida ne'e ho padraun ne'ebé Timor-Leste merese, ba jerasaun ohin loron no jerasaun sira tuir mai.

#MédiaME