Projetu Basic Education Strengthening and Transformation (BEST) ne’ebé finansiadu husi Global Partnership for Education (GPE) liuhosi Banku Mundiál iha Timor-Leste kontinua fó apoiu hodi hala’o formasaun iha Autoridade da Rejiaun Administrativa Espesiál Oecusse Ambeno (RAEOA). Formasaun ne’e realiza iha Salaun INFORDEPE RAEOA durante loron 6 (neen) hahú husi loron 13 – 17 fulan Maiu 2025.
Formasaun ne’ebé hala’o iha Salaun INFORDEPE RAEOA ho tipu 3 (tolu) no alvu partisipante ne’ebé diferente. Tipu formasaun ho nia alvu partisipante mak hanesan; Formasaun kona-ba Kria Google Classroom (dokumentu sira ligadu ho formasaun hotu-hotu ne’ebé hala’o ona asegura hotu iha Google Classroom) ho nia partisipante mak mentor munisipál 14 (sanulu resin haat) kompostu husi Munisipiu Ainaro, Ermera no RAEOA, formasaun Indusaun ba Mentor lokál Programa ALMA no EMULI ho nia partisipante mentor lokál hamutuk 11 (sanulu resin ida) ne’ebé foin rekrutadu liuhusi Diresaun Nasional Ensinu Báziku (DNEB) no Rekursu Umanu, Ministériu Edukasaun.
Mentor lokál foun sira kompostu husi Munisipiu Lautem, Manatuto no RAEOA, no formasaun kona-ba Leitór Emerjente ne’ebé ligadu ho Literasia ho nia partisipante mentor lokál RAEOA nomós Adjuntu diretór EBC ezistente sira iha RAEOA. Tuir planu, ekipa Projetu BEST sei hala’o mos formasaun ida kona-ba abilidade aprendizajen ba sekulu 21 nian iha RAEOA ne’ebé sei realiza iha loron 31 fulan Maiu 2025.
