Konsellu Ministru aprova projetu Dekretu-Lei, ne’ebé aprezenta husi Ministra Edukasaun, Dra. Dulce de Jesus Soares, kona-ba Rejime Esepsionál ba Promosaun Pesoal Integradu Bazeia ba Antiguidade iha Kareira Dosente.
Kareira dosente nian, ne'ebé regula hosi Dekretu-Lei No. 23/2010 hosi loron 9 fulan-Dezembru, hetan revizaun iha tinan 2023 hosi Dekretu-Lei No. 31/2023 hosi loron 31 fulan-Maiu, ne'ebé simplifika sistema hosi teste sira avaliasaun nian ba objetivu asesu no promosaun nian, hodi kria avaliasaun kompeténsia obrigatóriu hanesan mekanizmu prinsipál ba avansu nian.
Iha kontestu atuál, profesór rihun ida liu, maski sira nia dedikasaun no kontribuisaun ba dezenvolvimentu iha sistema nasionál edukativu, sira ne’ebe iha nivel ikus hosi sira ida-idak nia grau no besik tama ba idade reforma obrigatoriu nian.
Medida ida-ne'e tuir Dekretu-Lei No. 9/2025 loron 30 fulan-abríl nian, ne'ebé estabelese limite idade ba terminasaun servisu iha Administrasaun Públika iha tinan 65, hodi garante katak profesór sira ne'ebé besik reforma hetan rekoñesimentu ba sira nia kontribuisaun iha sistema edukasaun nasionál.
Dekretu-Lei ne'e mós estabelese katak promosaun esepsionál sira sei hahú iha loron 1 fulan-novembru tinan 2025, ba profesór sira ne'ebé kobre iha faze dahuluk, no iha loron 1 fulan-janeiru tinan 2027, ba sira ne'ebé kobre iha faze daruak.
