Dili, 22 Outubru 2025
Sua Exelénsia Ministra Edukasaun, Dra. Dulce de Jesus Soares hamutuk ho Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Volasionál, Sr. Domingos Lopes Lemos no Dirijente sira Ministériu Edukasaun nian, hala'o audiénsia ho Komisaun G Parlamentu Nasionál hodi ko'alia kona-ba Orsamentu Jerál Estadu ne'ebé koloka mai Ministériu Edukasaun hodi bele implementa programa prioridade sira ne'ebé iha.
Iha entrevista, Sua Exelénsia Ministra Edukasaun, Dra. Dulce de Jesus Soares, hateten, ohin Ministériu Edukasaun iha audiénsia ho Komisaun G Parlamentu Nasionál hodi ko'alia kona-ba Orsamentu Jerál Estadu ba Ministériu Edukasaun ne’ebé maka simu hamutuk, $. 117.550.330 dolar, no husi orsamentu ne'e koloka ba saláriu vensimentu hamutuk, $. 903.624.245 dolar, bem servisu hamutuk, $. 10.21 mil, transferensia públika hamutuk, $. 4.852 mil, kapitál meñor hamutuk, $. 2 miloens, kapitál dezenvolvimentu hamutuk, $. 7 Miloens.
"Ezekusaun agora daudaun atinje ona porsentu 79% ba programa tuir ketegoria ne’ebé iha ona, hanesan saláriu vensimentu, ben servisu, kapitál meñor, transferensia públika no kapitál dezenvolvimentu, maibé mós iha nia programa estratéjiku hanesan kurríkulu nasionál, infraestutura, jestaun eskolár no programa sira seluk tan", dehan S. E. Ministra Edukasaun.
Governante ne'e hatutan, programa prioridade iha 5 karik bele dehan reforsa institusional, pré-eskolár, ensinu báziku, ensinu sekundáriu no ensinu rekorrente, maibé bainhira haree filafali ba programa prioridade mak infraestutura eskolár, kurríkulu nasionál, teknolojia informátika,formasaun professores no jestaun eskolár.
#MédiaME
