Díli, 08 Agostu 2025 – Governu Timor-Leste, liuhusi Ministériu Finansa no Ministériu Edukasaun, hamutuk ho Ajénsia Kooperasaun Internasionál Korea (KOICA), asina Memorandu Entendimentu atu implementa Projetu Reabilitasaun Eskola Sekundária Téknika Vokasionál Becora, hodi hametin kapasidade institusionál no investe iha futuru juventude Timor-Leste nian.
Iha serimónia asinatura ne’e, Sua Exelénsia Ministra Finansa, Sra. Santina J. R. F. Viegas Cardoso, hateten, Projetu Reabilitasaun Eskola Téknika Sekundária Becora, reprezenta liu fali dezenvolvimentu infraestrutura. Ne'e investimentu ida iha ita-nia kapitál umanu. Projetu ida-ne'e, bainhira implementa tiha ona, hein katak sei hasa'e kualidade edukasaun no formasaun ba estudante sira. Liu husi reforsu sustentabilidade no jestaun institusionál, sei asegura viabilidade eskola nian ba tempu naruk nu'udar sentru exelénsia iha ita-nia komunidade.
“Governu Timor-Leste, liuhusi Ministeriu Finansa, promete ita-nia apoiu tomak atu asegura projetu ne'e nia susesu no sustentabilidade. Ami sei servisu hamutuk ho KOICA, Ministériu Edukasaun, no parte interesada lokál sira hodi alkansa ami-nia objetivu sira ne'ebé fahe ona”, dehan S.E. Ministra Finansa.
Governante ne’e hatutan, Serimónia asinatura ohin nian simboliza ita-nia esperansa no progresu. Hamutuk, ita la'ós de'it harii fali eskola ida: ita fó-hanoin mehi ba foin-sa'e Timor-Leste nian no investe iha futuru nasaun nian.
Hafoin asinatura, Sua Exelénsia Ministra Edukasaun, Dra. Dulce de Jesus Soares, hateten, lori Ministériu Edukasaun nia naran, hakarak hato'o agradese ba Ajénsia Kooperasaun Internasionál Korea nian, (KOICA), ba parseria ne'ebé kontinua no laranluak iha dezenvolvimentu nasaun, liuliu iha setór edukasaun ne'ebé importante.
“Asinatura Memorandu Entendimentu ne'ebé ita haree ohin, ba projetu reabilitasaun Eskola Téknika Becora nian, ida-ne'e la'ós de'it atu kontinua projetu, maibé atu renova ita-nia kompromisu konjunta ba futuru juventude sira-nian no atu hametin edukasaun téknika-vokasionál iha Timor-Leste”, dehan S.E. Ministra Edukasaun.
Governante ne’e hatutan, Eskola Téknika Becora, tenke rekoñese katak projetu ne'e ohin hanesan kontinuasaun importante ida ba kompromisu ne'ebé KOICA fó ona ba eskola ne'e. Iha tinan 2017, bainhira KOICA ofisialmente entrega eskola ne'e ba Ministériu Edukasaun, hafoin investimentu hamutuk dolar millaun $8.1. Embaixadór Korea nian ba Timor-Leste hato'o nia konfiansa katak Eskola Téknika Becora sei sai eskola téknika ne'ebé di'ak liu iha nasaun ne'e no tinantinan sira fornese rekursu no profesór sira husi Korea hodi asegura katak objetivu ida-ne'e bele kumpre.
#joanalistaluisalmeida
#MédiaME
