Lautém, Serelau, 02 Outubru 2025
Komunidade edukativa iha Eskola Ensinu Báziku Filiál (EBF) Serelau espresa sira-nia agradesimentu no apresiasaun bo'ot ba Ministériu Edukasaun tanba implementasaun ho susesu husi Programa EMULI (Edukasaun Multilingue Bazeia ba Lian Inan). Sira konsidera programa ne’e nu’udar revolusaun ki'ik iha aprendizajen inisiál.
Vise Koordenadora EBF Serelau, Mestra Jacinta da Costa, hato'o katak EMULI sai nu'udar solusaun esensiál ida hodi hasa'e kualidade aprendizajen, liuliu ba labarik sira iha klase inisiál ne'ebé antes ne'e hetan difikuldade atu komprende aula ho lian ofisiál.
Nia argumenta tan katak EMULI ninia forsa mak iha nia metodu. "Labarik sira hahú prosesu aprendizajen ho lian inan, ida-ne'e halo sira komprende konseitu foun, hanesan numerasia no literasia sira, ho lalais. Ida-ne'e halo baze edukasaun sai metin liu no fó sira konfiansa."
Jacinta da Costa esplika katak benefísiu husi uza lian inan ne'e la'ós de'it paradu iha klase inisiál, maibé habelar mós ba klase tuir mai.
"Bainhira labarik sira komprende ho di'ak no sira-nia baze forte ona, sira-nia rezultadu no dezempeñu iha matéria seluk mós di'ak bainhira sira halo tranzisaun ba lian ofisiál. Labarik sira la presiza hanoin barak kona-ba lian atu komprende aula, sira bele tau fokus ba matéria," nia dehan.
Komunidade EBF Serelau agradese tebes tanba tau atensaun ba nesesidade labarik rurál nian. Sira hato'o esperansa bo'ot atu programa EMULI ne'e bele sai programa permanente no habelar ba eskola sira seluk iha Munisípiu Lautém no territóriu tomak.
Eskola EBF Serelau dadaun ne’e atende estudante na’in-137 (mane 65 no feto 72) no iha manorin na’in-5 (mane 2 no feto 3).
#JornalistaEmiliodaCruzLopes
#MÉDIA-ME
