Dili, Kinta-feira, 24 Abril 2025 - Ministériu Edukasaun liu-hosi Diretora Jerál Planu Polítika Inkluzaun no Informátika (DGPPII) Sra. Odília das Dores Ung Martins hamutuk ho Diretór Nasionál Edukasaun Inkluziva no Asaun Sosiál Eskolar (DNEIASE) Sr. Fernando Soares hala’o sorumutu kona-ba Estabelesimentu Grupu Traballu Tékniku Edukasaun Inkluzivu, iha sala Suai Room, Timor Plaza, Dili.
Iha okaziaun ne'e, Diretora Jerál Planu Polítika Inkluzaun no Informátika (DGPPII) Sra. Odília das Dores Ung Martins hateten, ita tenki halo sosializasaun maka’as ba iha ita nia komunidade sira atu koñese situasaun sira ne’ebé mak ita nia oan sira hasoru, nafatin ho espíritu hakarak hatudu oan sira mai aprende buat ruma.
“Identifika difikuldade ne’ebé mak iha atu nune’e ita bele buka solusaun, ita nia maluk defisiensia sira, prontu atu apoiu ita ba iha formasaun lian jestuál, ita tenke haforsa malu hodi atinji ita nia meta sira katak ita servisu la husik ida iha kotuk ita sei tau sira hamutuk la haree ba sira nia klase sosiál, kór no relijiaun”, Dehan Diretora.
Entretantu, Diretór Nasionál Edukasaun Inkluziva no Asaun Sosiál Eskolar (DNEIASE) Sr. Fernando Soares hateten, Edukasaun Inkluziva sensitivu lós, ita presiza kria grupu traballu akumula entidade hotu-hotu nune’e ita bele rona sira nia hanoin, sujestaun no tulun atu halo di’ak liu tan iha setór edukasaun liu-liu Edukasaun Inkluzivu.
Iha grupu traballu ne’e, partisipa husi Dirijente Ministériu Edukasaun nian, Associação de Deficiente de Timor-Leste (ADTL), Parseiru Dezenvolvimentu, Mary Mackillop Today no entidade sira.
#MEDIA-ME
