Dili, 25 Abril 2025 – Sua Exelénsia Ministra Edukasaun, Dra. Dulce de Jesus Soares, simu vizita husi ekipa Sekolah Tinggi Pastoral Keuskupan Agung Kupang (STPKAK), Indonézia, iha enkontru ofisiál iha Ministériu Edukasaun, hodi ko’alia kona-ba posibilidade explora kooperasaun ba futuru entre STPKAK no Ministériu Edukasaun Timor-Leste. Enkontru ne’e realiza iha Sala VIP, Ministériu Edukasaun, Vila-Verde.
Iha deklarasaun ba jornalista sira, S.E. Ministra Edukasaun Dra. Dulce de Jesus Soares, hateten, ohin dadeer ne’e simu ekipa husi Sekolah Tinggi Pastoral Keuskupan Agung Kupang. Eskola ne’e la’os foun iha relasaun ho Timor-Leste, tanba iha tempu kotuk sira halo ona kooperasaun ho Eskola Téknika Vokasionál iha Salele, Munisípiu Covalima, no estudante timoroan na’in tolu mak hala’o hela estudu iha Kupang.
“STPKAK halo ona kooperasaun ho Semináriu Balide, ne’ebé kontinua fó kontribuisaun liuhusi prátika no servisu sosiál sira no mós ajuda formasaun ba estudante timoroan sira ne’ebé hetan bolsa estudu atu ba estuda iha Indonézia, liuhusi formasaun Lian Melayu”, dehan S.E. Ministra Edukasaun.
Governante ne’e hatutan, Ministériu Edukasaun sei konsidera informasaun ne’e no tetu posibilidade kooperasaun, bazeia ba esperiénsia sira iha terrenu.
Iha fatin hanesan, Diretór Sekolah Tinggi Pastoral Keuskupan Agung Kupang, Pe. Maxi Un Bria, hateten, kontente tebes ho oportunidade atu hasoru Malu ho Ministra no dirijente sira, no hato’o katak husi tinan 2024, estudante sira husi STPKAK halo ona peskiza no servisu sosiál iha Suai, liu-liu iha Selele no Fohoren.
“Ohin ami halo koordenasaun ho Ministériu Edukasaun atu buka dalan hodi servisu hamutuk ba futuru. Ami prontu atu kontinua fó estudante sira ba prátika hanorin iha Timor-Leste, la’os de’it iha eskola privadu, maibé bele mós iha eskola públiku sira,” dehan Diretór STPKAK, Pe. Maxi.
Dirijente ne’e hatutan, STPKAK mós lori dosente sira atu halo peskiza no asesoria ba komunidade iha Timor-Leste. Kolaborasaun ida ne’e parte husi vizau no misaun komún atu aumenta kualidade rekursu umanu liuhusi edukasaun.
#MédiaME
