Dili, 23 Abril 2025 — Sua Exelénsia Ministru Edukasaun Interinu, Sr. Domingos Lopes Lemos, akompaña husi Xefe Gabinete Ministra Edukasaun, Sra. Paula Araújo Corte-Real no Xefe Gabinete Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Sr. Napoleão de Araújo Santos Lima, hamutuk ho dirijente no funsionáriu tomak Ministériu Edukasaun nian, hatudu sentidu kondolénsia profunda liuhusi orasaun no sunu lilin ba Sua Santidade Papa Francisco, ne’ebé hakotu ona nia peregrinasaun moris iha mundu.
Ministeriu Edukasaun hala’o serimónia orasaun nian ba Sua Santidade Papa Francisco iha Monumentu Nossa Senhora Maria Imakulada Lecidere, Dili. Orasaun no sunu lilin hala’o ho onra profunda no armonia, hanesan forma simbólika no lian hamutuk hodi hato’o lutu no gratidaun ba moris no servisu boot ne’ebé Papa Francisco fó ba Igreja Katólika tomak.
Ministériu Edukasaun kontinua orasaun ba Sua Santidade Papa Francisco nia klamar, atu Maromak simu nia iha nia kadunan santu ho glória.
Papa Francisco moris iha loron 17 fulan Dezembru tinan 1936, iha Buenos Aires, Argentina, no hili ba pontífise iha tinan 2013, no hakotu iis iha loron 21 fulan abril tinan 2025 ho idade 88.
#MédiaME
