𝑩𝒂𝒖𝒄𝒂𝒖, 12 𝑱𝒖ñ𝒖 2025 – 𝑮𝒐𝒗𝒆𝒓𝒏𝒖 𝑻𝒊𝒎𝒐𝒓-𝑳𝒆𝒔𝒕𝒆 𝒍𝒊𝒖𝒉𝒖𝒔𝒊 𝑴𝒊𝒏𝒊𝒔𝒕é𝒓𝒊𝒖 𝑨𝒅𝒎𝒊𝒏𝒊𝒔𝒕𝒓𝒂𝒔𝒂𝒖𝒏 𝑬𝒔𝒕𝒂𝒕á𝒍 𝒓𝒆𝒂𝒍𝒊𝒛𝒂 𝒔𝒐𝒓𝒖𝒎𝒖𝒕𝒖 𝒊𝒉𝒂 𝒎𝒖𝒏𝒊𝒔í𝒑𝒊𝒖 𝑩𝒂𝒖𝒄𝒂𝒖 𝒊𝒉𝒂 𝒍𝒐𝒓𝒐𝒏 𝒌𝒊𝒏𝒕𝒂-𝒇𝒆𝒊𝒓𝒂 𝒏𝒆’𝒆 𝒉𝒐𝒅𝒊 𝒂𝒑𝒓𝒆𝒛𝒆𝒏𝒕𝒂 𝒌𝒐𝒏𝒂-𝒃𝒂 á𝒎𝒃𝒊𝒕𝒖 𝒑𝒓𝒐𝒔𝒆𝒔𝒖 𝒅𝒆𝒔𝒆𝒏𝒕𝒓𝒂𝒍𝒊𝒛𝒂𝒔𝒂𝒖𝒏 𝒏𝒐 𝒓𝒆𝒇𝒐𝒓𝒔𝒂 𝒑𝒐𝒅é𝒓 𝒍𝒐𝒌á𝒍.
Iha enkontru ida-ne’e Sua Exelénsia Ministra Edukasaun, Dra. Dulce de Jesus Soares, partisipa nu’udar membru Governu Konstitusionál ba dasiak hodi halo abertura ba lansamentu ofisiál ekipa integrada ba apoiu munisípiu, iha ámbitu prosesu desentralizasaun no reforsa podér lokál iha Timor-Leste. Lansamentu importante ne’e hala’o iha Sentru Konvensaun Baucau, hanesan parte husi esforsu governu atu aprofunda autonomia lokál no hadi’a servisu públiku ba komunidade sira.
Iha diskursu, Sua Exelénsia Ministra Edukasaun, Dra. Dulce de Jesus Soares, hateten, vizaun no kompromisu ne'ebé governu hatudu liuhusi Ministériu Administrasaun Estatál presiza rekoñese ho pozitivu. Kompromisu ida-ne’e bele akontese de'it tanba iha apoiu maka'as husi estrutura tomak IX Governu Konstitusionál. Hahú husi loron dahuluk mandatu IX governu nian, servisu maka'as hodi promove administrasaun públika ida-ne'ebé transparente liu, efisiente liu no besik ba sidadaun sira.
“Ha’u hakarak espresa ha’u-nia sinseru parabéns ba governo, liuliu ba Ministériu Administrasaun Estatál ba nia kompromisu bo'ot hodi promove prestasaun servisu públiku ne'ebé efisiente no asesível liu ba ita-nia komunidade sira”, dehan S.E. Ministra Edukasaun.
Governante ne’e hatutan, desentralizasaun servisu públiku nu'udar parte esensiál ida husi ita-nia vizaun ba futuru Timor-Leste ne'ebé nabilan. Asesu lokál ba serbisu públiku hadi'ak efisiénsia ba prestasaun servisu, no fortalese relasaun entre governu ho nia komunidade lokál, no bele hametin liután kompromisu komún kona-ba dezenvolve ita-nia nasaun.
Iha ámbitu lansamentu ne’e, Sua Exelénsia Ministra Edukasaun, Dra. Dulce de Jesus Soares, husu ba prezidente autoridade sira hotu, atu labele haluha objetivu hosi merenda eskolár. Prosesu administrativu sira hotu relasiona ho merenda eskolár tenke hakru'uk no haree ba kestaun nutrisaun labarik nian. Monitora implementasaun merenda atu garante asesu ba nutrisaun no promove asesu ba saúde eskolár mak nu'udar kestaun prioridade. Nune’e, labarik sira iha kondisaun atu estuda ho di'ak no dezenvolve sira-nia matenek, no nutrisaun mak nu'udar dalan hodi hetan rezultadu ida-ne'e.
Lansamentu ekipa integrada ne’e mak parte husi estratéjia governu gonstitusionál dasiak nian, atu implementa reforma administrativa ne’ebé inklui prestasaun servisu públiku ne’ebé transparente, responsável no báziku ba sidadaun hotu.
#JornalistaPaulaDelgado
#MédiaME
