𝗠𝗜𝗡𝗜𝗦𝗧É𝗥𝗜𝗨 𝗘𝗗𝗨𝗞𝗔𝗦𝗔𝗨𝗡 𝗛𝗢 𝗜𝗣𝗕𝗜 𝗛𝗔𝗟𝗢 𝗩𝗜𝗭𝗜𝗧𝗔 𝗕𝗔 𝗘𝗦𝗞𝗢𝗟𝗔 𝗛𝗢𝗦𝗣𝗜𝗧𝗔𝗟𝗜𝗗𝗔𝗗𝗘 𝗡𝗢 𝗧𝗨𝗥𝗜𝗭𝗠𝗨

Díli, Kinta-feira, 12 Juñu 2025
Ministériu Edukasaun liu-hosi Diretór Jerál Ensinu Sekundáriu (DGES) Sr. Deolindo da Cruz hamutuk ho Dirijente no delegasaun husi Institut Pariwisata dan Bisnis Internasional (IPB Internasional) husi Bali, Indonesia, hala’o vizita ofisiál ba Eskola Hospitalidade no Turizmu (EHT) iha Becora.

Durante intervista, Sr. Deolindo da Cruz esplika, vizita ne’e importante tanba EHT mak eskola
ida uniku ne’ebé fó formasaun iha area Hospitalidade no Turismu iha Timor-Leste.

“Iha futuru, Ministériu Edukasaun bele buka dalan atu halo kooperasaun ho IPB Internasional
hodi fó oportunidade ba manorin sira atu simu treinamentu iha Bali. Karik akordu ne’e realiza,
sira mós haruka sira nia docente no peritu sira mai partilla koñesimentu iha EHT”, nia dehan.

Iha sorin seluk, Vise Reitora ba Parseria, Relasaun Públika, Promosaun no Alumni husi IPB
Internasional Sra. Ni Made Ayu Sulasmini, mós hatete katak molok vizita, ami aprezenta tiha
ona ideia ba Ministra Edukasaun Dra. Dulce de Jesus Soares kona-ba expozisaun hodi hasoru
malu ho estudante sira ne’ebé hakarak kontinua estudu iha nível Ensinu Superior iha Bali, liu-liu
ba area Hospitalidade no Turizmu.

Entretantu, Diretór EHT Sr. Charles Fatima Guterres hatete, vizita ne’e importante tebes atu loke odamatan Parseria. “EHT sempre buka parseiru atu fó oportunidade di’ak ba estudante sira,” nia
hatete.

Vizita ida ne’e hatudu interese no Kompromisu husi parte Ministériu Edukasaun no IPB Internasional atu hametin kooperasaun edukativu no fó oportunidade bo’ot ba estudante sira iha setor Hotelaria no Turizmu iha Timor-Leste.

# MÉDIA-ME
# JornalistaEmilio