𝐌𝐈𝐍𝐈𝐒𝐓É𝐑𝐈𝐔 𝐄𝐃𝐔𝐊𝐀𝐒𝐀𝐔𝐍 𝐍𝐎 𝐄𝐒𝐓𝐔𝐃𝐀𝐍𝐓𝐄 𝐇𝐔𝐒𝐈 𝐄𝐁𝐂 𝐌𝐀𝐍𝐋𝐄𝐔𝐀𝐍𝐀, 𝐀𝐆𝐑𝐀𝐃𝐄𝐒𝐄 𝐁𝐀 𝐀𝐏𝐎𝐈𝐔 𝐁𝐄𝐄 𝐌𝐎𝐎𝐒 𝐇𝐔𝐒𝐈 𝐑𝐎𝐓𝐀𝐑𝐘 𝐂𝐋𝐔𝐁 𝐀𝐔𝐒𝐓𝐑Á𝐋𝐈𝐀

𝐃í𝐥𝐢, 𝟏𝟎 𝐉𝐮ñ𝐮 𝟐𝟎𝟐𝟓 – 𝐌𝐢𝐧𝐢𝐬𝐭é𝐫𝐢𝐮 𝐄𝐝𝐮𝐤𝐚𝐬𝐚𝐮𝐧, 𝐡𝐚𝐦𝐮𝐭𝐮𝐤 𝐡𝐨 𝐞𝐬𝐭𝐮𝐝𝐚𝐧𝐭𝐞 𝐧𝐨 𝐩𝐫𝐨𝐟𝐞𝐬ó𝐫 𝐬𝐢𝐫𝐚 𝐡𝐮𝐬𝐢 𝐄𝐬𝐤𝐨𝐥𝐚 𝐄𝐧𝐬𝐢𝐧𝐮 𝐁á𝐳𝐢𝐤𝐮 𝐒𝐞𝐧𝐭𝐫á𝐥 (𝐄𝐁𝐂) 𝐌𝐚𝐧𝐥𝐞𝐮𝐚𝐧𝐚, 𝐟ó 𝐚𝐠𝐫𝐚𝐝𝐞𝐬𝐢𝐦𝐞𝐧𝐭𝐮 𝐛𝐨𝐨𝐭 𝐛𝐚 𝐊𝐨𝐧𝐠𝐫𝐞𝐠𝐚𝐬𝐚𝐮𝐧 𝐒𝐚𝐥𝐞𝐳𝐢𝐚𝐧𝐮 𝐧𝐨 𝐑𝐨𝐭𝐚𝐫𝐲 𝐂𝐥𝐮𝐛 𝐡𝐮𝐬𝐢 𝐀𝐮𝐬𝐭𝐫á𝐥𝐢𝐚 𝐧𝐞’𝐞𝐛é 𝐤𝐨𝐨𝐩𝐞𝐫𝐚 𝐡𝐨𝐝𝐢 𝐟𝐨𝐫𝐧𝐞𝐬𝐞 𝐛𝐞𝐞 𝐦𝐨𝐨𝐬 𝐛𝐚 𝐞𝐬𝐤𝐨𝐥𝐚 𝐧𝐞’𝐞. 𝐀𝐩𝐨𝐢𝐮 𝐢𝐝𝐚 𝐧𝐞’𝐞 𝐟ó 𝐢𝐦𝐩𝐚𝐤𝐭𝐮 𝐩𝐨𝐳𝐢𝐭𝐢𝐯𝐮 𝐛𝐚 𝐥𝐚𝐛𝐚𝐫𝐢𝐤 𝐬𝐢𝐫𝐚 𝐧𝐞’𝐞𝐛é 𝐚𝐧𝐭𝐞𝐬 𝐥𝐚 𝐡𝐞𝐭𝐚𝐧 𝐚𝐬𝐞𝐬𝐮 𝐛𝐚 𝐛𝐞𝐞 𝐦𝐨𝐨𝐬 𝐡𝐚𝐧𝐞𝐬𝐚𝐧 𝐩𝐚𝐫𝐭𝐞 𝐢𝐦𝐩𝐨𝐫𝐭𝐚𝐧𝐭𝐞 𝐛𝐚 𝐬𝐚ú𝐝𝐞 𝐧𝐨 𝐦𝐨𝐫𝐢𝐬 𝐝𝐢’𝐚𝐤.

Iha inaugurasaun bee moos ne’e, Sua Exelénsia Ministra Edukasaun, Dra. Dulce de Jesus Soares, hateten, Ministériu Edukasaun hamutuk ho estudante no profesór husi Eskola Ensinu Báziku Sentrál (EBC) Manleuana, agradese tebes ba kongregasaun Salezianu ne’ebé servisu hamutuk ho Rotary Club husi Austrália hodi fornese bee moos ba labarik sira atu hemu, tanba hatene katak labarik sira ladún hemu bee.

“Eskola hamutuk 29 mak hetan ona apoiu husi Rotary Club no ita hein katak estudante sira-nia taxa partisipasaun no dezempeñu bele di’ak liután, tanba sira iha bee moos hodi hemu loron-loron”, dehan S.E. Ministra Edukasaun.

Governante ne’e hatutan, Ministériu Edukasaun sei kontinua buka maineira oinsá atu koopera ho parseiru sira, nune’e bele kontinua apoiu ba eskola sira seluk iha rai-laran, liuliu ba sira ne’ebé enfrenta situasaun difísil hodi asesu ba bee moos ne’ebé seguru.

Inisiativa ida ne’e mak rezultadu husi kooperasaun internasionál, solidariedade komunidade no kompromisu atu promove direitu estudante sira ba ambiente aprendizajen ne’ebé saudável. Kooperasaun ne’e mak evidénsia katak parseiru sira iha ita-nia dezenvolvimentu edukasaun Timor-Leste nian.

#JornalistaPAulaDelgado
#MédiaME