Dili - loron 19-03-2025, Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos, halo abertura Workshop ba Diretór Munisípiu sira no Diretór Eskola Téknika Vokasionál sira ho tema Dijitalizasaun eskola Téknika Vokasionál no Avaliasaun Dezempeñu ba diretiva eskola Téknika Vokasionál, iha salaun Ian Martin INFORDEPE Kuarta-feira ne'e.
Iha intervensaun Sua Exelénsia Sekretáriu Estadu ESJ-ESTV Sr. Domingos Lopes Lemos, hateten loron ohin halo workshop ida ne'e kona-ba utilizasaun dijitalizasaun iha eskola sira, liu-liu eskola téknika vokasionál sira.
"Edukasaun mak baze Dezenvolvimentu ba sustentável ba nasaun ida nian, iha kestaun ida ne’e ESTV hala'o papél esensiál hodi prepara ita nia foin-sa’e sira atu hasoru dezafiu sira iha merkadu traballu nian no kontribui ba progresu nasaun nian. Dijitalizasaun no avaliasaun dezempeñu ne'ebé ami sei aborda iha ne'e mak pilár fundamentál sira atu asegura katak ami nia eskola sira mak fatin inovasaun nian".
Governante ne’e dehan, Workshop ida ne’e mosu hanesan Plataforma ida hodi troka ideia fahe prátika di'ak no harii solusaun ne'ebé adapta ba realidade eskola sira nian. Husu ba Diretór Eskola sira katak mundu agora mundu Dijitalizasaun hotu-hotu atu adapta ho situasaun sira ne'e, eskola Téknika Vokasionál importante loos atu responde merkadu traballu.
Iha fatin hanesan Diretór Ezekutivu Teknologia Informasaun no Komunikasaun (TIC Timor), hateten, Onra boot ida ba TIC Timor hodi bele partisipa no partilla informasaun kona-ba Dijitalizasaun ba Diretivas eskola sira, hodi partilla buat rua mak hanesan, Governu Eletróniku no Dijitalizasaun.
"Ajénsia TIC Timor agora halo servisu ho Ministériu Edukasaun iha área barak ona, ne'ebé mak dezevolve iha diskusaun hodi lori prosesu ba oin kona-ba dijitalizasaun rezistamentu avaliasaun no Ezame".
#MédiaME
