Dili – Loron Kinta-feira, 20 Marsu 2025
Sua Exelénsia Ministra Edukasaun Dra. Dulce de Jesus Soares, partisipa iha serimónia abertura ba konferénsia internasionál ho tema, “Hametin Transformasaun Dijitál hodi Hametin Servisu Públiku sira: Hasa’e Transparánsia, Efisiénsia no Efikásia. Konferénsia ne’e realiza iha Sentru Konvensoens Dili (CCD-sigla portugés).

Iha abertura konferénsia internasionál ne’e, Sua Exelénsia, Vise-Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, hateten, ohin organiza konferénsia internasionál ida hamutuk ho belun sira mai husi Ásia, tanba ho apoiu husi Ásia, liu mós husi Embaixadór sira husi Ásia iha ne’e, no mós ho embaixadór sira husi nasaun seluk, ho sira-nia apoiu mak ohin loron Timor-Leste sai membru ASEAN.

“Ita tenki hahú ho efisiénsia ba hametin transformasaun dijitál iha ita-nia rai, no tenki haforsa ita-nia public service ba dijitál ne’ebé mak inovasaun”, dehan S.E. Vise-Primeiru Ministru.

Iha fatin hanesan, Ministru Transporte no Komunikasaun, Eng. Miguel Marques Gonçalves, hateten, semináriu internasionál ida ne’e nu’udar plataforma ka mekanizmu importante ida atu tau hamutuk ita-nia vizaun ba Timor-Leste nia jornada transformasaun dijitál.

“Semináriu ida ne’e sai mós hanesan momentu importante ida atu hametin liután ita-nia amizade no kooperasaun internasionál ho país amigu sira, tanba ne’e tema ba semináriu ida ne’e mak oinsá ita harii fundasaun ida metin ba infraestrutura dijitál no konektividade, siguransa sira ne’e iha dijitalizasaun, governu eletrónika no ekonomia dijitál”, dehan S.E. Ministru Transporte no Komunikasaun.

#MédiaME