𝘽𝙤𝙡𝙨𝙖 𝙆𝙖𝙣𝙙𝙞𝙙𝙖𝙩𝙪: 𝙈𝙖𝙣𝙤𝙧𝙞𝙣 𝙇𝙪𝙘𝙞𝙖𝙣𝙤 𝙙𝙚 𝙉𝙚𝙧𝙞, 𝙆𝙤𝙫𝙖𝙡𝙞𝙢𝙖-𝙤𝙖𝙣!

Manorin De Neri, manorin foun hosi Bolsa Kandidatu (BK), mak haksolok ho konkursu públiku ne’ebé hala’o hosi Ministériu Edukasaun. Nia mós hato’o apresiasaun ba lideransa másimu Ministériu Edukasaun, Excia. Ministra Dulce de Jesus Soares, ba inisiativu foun ida-ne’e.

Manorin ne’e konkorre no pasa hosi teste rekrutamentu tinan liubá. Manorin ne’e hatutan katak “konkorre iha prosesu méritu mak esperiénsia foun atu hahú ha’u-nia karreira, no hanorin iha Eskola Báziku Filiál 1 2 nú. 5 Comoro Dili, mak oportunidade ida mai ha’u atu hatudu ha’u-nia matenek no abilidade hanesan manorin foin-sa’e ho misaun atu lori mudansa ba estudante nia moris iha aspetu akadémiku, sosiál no emosionál.

Dada-lia ho Manorin Luciano ne’e hala’o ho ekipa ida hosi Gabinete Ministra Edukasaun iha loron 15 fulan-marsu 2025 iha Eskola Báziku Filiál 1 2 nú. 5 Comoro, bainhira husu tuir kona-ba mudansa sira ne’ebé nia bele halo iha estudante sira-nia prosesu aprendizajen. De Neri hatán, “la’o tuir kurríkulu nasionál ho loos, opta métodu ensínu partisipativu, prátiku no kriativu. Nune’e, estudante sira iha biban ko’alia, observa, analiza, no konstrui ideia sira-nian rasik. Hanesan ezemplu, bainhira hanorin matemátika, ha’u fó oportunidade ba sira sura hodi uza objetu oioin, fó dalan ba rezolve sira-nia problema ho krítiku, liuhosi pratika, kaer, haree objetu, koko no rezolve mesak.

“Iha siénsia naturál ha’u fó biban ba sira atu observa kona-ba ár. Oinsá ár ne’e muda iha moris, no oinsá estudante sira haree no sente mesak ár ne’e nia impaktu ba sira-nia an. Ezemplu dada-iis, entaun ha’u husik estudante sira observa oinsá dada iís, sistema respiratóriu la’o ho ár no ami mós koa’lia kona-ba komposizaun ár ho ninia impaktu ba moris, inklui ema nia moris”.

Manorin De Neri hanorin iha klase lima, nune’e nia mak manorin turma nian no kaer dixiplina sira hotu. Nia mak Kovalima-oan, no sente orgullu ho ninia karreira agora hanesan manorin. Nia observa katak estudante barak iha ninia klase gosta múzika. Nune’e aleinde hanorin dixiplina jerál, nia mós foka ba múzika hanesan dalan ida ba aprende. “Ho múzika ita hakalma estudante sira, ho múzika ita motiva sira aprende, no ho múzika sira sente seguru no hadomi”, manorin
ne’e hatete.

Pratika di’ak ne’ebé ekipa Ministériu Edukasaun hetan katak manorin refere kuda rotina ne’ebé hatudu ninia domin ba ninia klase liuhosi halo limpeza hamutuk ho estudante sira
loroloron molok fahe malu. Ekipa ne’e nota katak, iha mós amizade entre manorin ne’e ho ninia estudante sira, liuliu bainhira manorin ne’e hetan surpreza hosi estudante sira ba ninia loron moris iha 15 marsu 2025. Iha ne’ebá sira han dose aniversáriu, huu lilin no kanta hamutuk.

Loron ne’e nota mós katak Manorin De Neri pesoalmente sente espesiál, tanba hetan vizita surpreza hosi ekipa Ministériu Edukasaun, Gabinete Ministra Edukasaun nian. “Obrigadu ba vizita surpreza no mós ba domin ne’ebé ha’u simu hosi ha’u-nia estudante doben sira”, dehan manorin ne’e.

Ikusliu, pesoál hosi Gabinete Ministra ne’e husu ba estudante sira: “Imi gosta imi-nia manorin foun ne’e?” Sira hotu hatán ho haksolok no lian maka’as, “AMI GOSTA, AMI GOSTA”!!

Parabens ba Manorin Luciano De Neri ba loron moris no ba karreira foun. Susesu ba Ita Ministériu Edukasaun.

#MédiaME