Covalima, loron 27 fulan Marsu 2024
Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos akompaña husi Diretór Edukasaun Munisípiu Covalima, Superintendente, Inspetor no Dirijente Edukasaun Munisípiu Covalima nian halo observasaun direta ba konkorente sira ne'ebé konkore hela vagatura iha Edifísiu Edukasaun Munisípiu Covalima, kinta-feira ne’e.
Iha entrevista Sua Exelénsia Sekretáriu Estadu ESJ-ESTV Sr. Domingos Lopes Lemos, hateten ohin ekipa mai haree prosesu konkorente sira ne’ebé konkore ba vagatura ne'ebé Ministériu Edukasaun anúnsiu iha loron hirak liu ba, ami haree, observa situasaun la'o di'ak tebetebes.
" Kritéria kona-ba oinsa atu aplika ba vaga refere Ministériu Edukasaun Públika ona iha pájina Facebook Ministériu Edukasaun nian, aplikante ida tenki aplika tuir ninian área espesialidade ensinu ne'ebé nia iha", dehan Governante ne'e.
Fatin hanesan Konkorente Vagatura Sr. Martinho Fereira, hateten ami apresia ho programa Nonu Governu Konstitusionál nian ne'ebé fó oportunidade ba Juventude atu bele kompete iha bolsa Kandidatura manorin-na’in nian ne’e.
"Senti orgullu tebetebes, tanba tempu kleur ami remata iha Universitáriu maibé laiha rekrutamentu vaga Profesór nian ohin Ministériu Edukasaun bele loke vaga refere"
Konkorente Martinho ne'e mós husu ba Ministériu Edukasaun, rekrutamentu refere atu la'o ho justu, atu nune’e ema hotu-hotu bele hetan oportunidade, hodi sai manorin-na’in ida ne'ebé di'ak iha futuru, iha nasaun Timor-Leste.
#MédiaME
