Dili – Loron Sexta-Feira, 28 marsu 2025
Ministériu Edukasaun liuhusi ninia Porta-Voz, Sr. Filipe Rodrigues Pereira, hamutuk ho Diretór Nasionál Rekursu Umanu, Sr. João Amaral, hala’o enkontru ho Eis-Profesór Kontratadu-2023 hodi ko’alia kona-ba teste espesiál bolsa kandidatu professores atu sai manorin iha estabelesimentu ensinu sira iha Timor-Leste.
Iha enkontru ne’e, Porta-Voz Ministériu Edukasaun, Sr. Filipe Rodrigues Pereira, hateten, la iha moru ida mak atu satan Eis-Profesór Kontratadu-2023 atu mai hola parte iha teste epesiál ne’e, tanba ne’e husu atu kaer dokumentu komprovativu ruma, hafoin mai hatudu iha Rekursu Umanu hodi bele hola parte iha teste espesial ne’e.
“Ho sistema teste espesial ne’e, bele hakotu tiha korente ida hatama ema arbiru hodi sai profesor, liuhusi meius familiarismu ne’ebe akontese tempu naruk hanesan tinan sira lubuk ba kotuk. Nune’e, ho sistema teste bele hases tiha familiarizu no grupuizmu iha área edukasaun, espesialmente iha ambitu rekrutamentu profesores, tanba ne’e ho ita-boot sira-nia prezensa iha teste espesial ne’e bele kopera di’ak liután hodi hadia kualidade edukasaun Timor-Leste iha futuru, dehan Porta-Voz ME.
Iha fatin hanesan, reprezentante Eis-Profesór Kontratadu-2023 Sra. Rosa, hateten, ami nia preokupasaun agora mak atu hetan oportunidade ba teste espesial, ami iha dokumentu komprovativu atu submete ba teste espesiál ne’e, no ami sei passa tutan informasaun ba ami nia maluk sira atu bele mai tuir teste espesial, buat seluk ne’ebé liu ona, ami labele ko’alia tán, tanba ne’e oportunidade teste espesiál ne’e ami hakarak konkore hotu. Antes hakat sai husi enkontru Sra. Rosa hateten tempu halo barulhu liu ona, agora tempu ba teste.
#MédiaME
