𝙎𝙀𝙆𝙍𝙀𝙏Á𝙍𝙄𝙐 𝙀𝙎𝙏𝘼𝘿𝙐 𝙀𝙎𝙅-𝙀𝙎𝙏𝙑 𝙃𝘼𝙇𝙊 𝙀𝙉𝙆𝙊𝙉𝙏𝙍𝙐 𝙃𝙊 𝘿𝙄𝙍𝙄𝙅𝙀𝙉𝙏𝙀 𝙀𝙎𝙆𝙊𝙇𝘼 𝙎𝙀𝙆𝙐𝙉𝘿Á𝙍𝙄𝘼 𝙅𝙀𝙍Á𝙇 𝙋Ú𝘽𝙇𝙄𝙆𝘼 𝙎𝙀𝙍𝘼𝙉𝙆𝙊𝙏𝙀𝙆 𝙎𝙐𝘼𝙄 𝙁𝙄𝙇𝙄𝘼𝙇 𝙎𝘼𝙇𝙀𝙇𝙀 𝙉𝙊 𝙀𝙎𝙏𝙑 𝘼𝙆𝘼𝙍 𝙇𝘼𝙍𝘼𝙉

Covalima, loron 27 fulan Marsu 2025, Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos, akompaña husi Diretora Edukasaun Munisípiu Covalima, Superientendente no Inspektór sira hala'o enkontru ho Dirijente Eskola Sekundária Jerál Públika Serankotek Suai Filial Salele no Eskola Sekundária Tékniku Vokasionál Akar Laran Suai, Kinta-feira ne’e.

Iha Enkontru ne'e Kordenador Eskola Sekundária Jerál Públika Serankotek Suai Filial Salele Daniel Cardoso, dehan Eskola Sekundária Jerál Públika Serankotek Suai Filial Salele iha preokupasaun lubuk ida agradese bele hato'o preokupasaun hirak ne'e diretamente ba Exelénsia.

"Eskola Sekundária Jerál Públika Serankotek Suai Filial Salele fatin ne'ebé mak uza ne'e eskola EBF ninian ho nia salaun ne’e medida ki'ik tebetebes, eskola turnu rua dader no lokoraik. Kona-ba infraestrutura mós menus tebetebes.

Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos hateten, ko'alia kona-ba preokupasaun eskola ida nian Ministériu Edukasaun mós preokupa tanba ne'e Ministériu Edukasaun sei haree, Nonu Governu Konstitusionál mai ho hanoin ida katak Edukasaun mak baze fundamentál nune’e presiza eleva kualidade edukasaun iha Timor-Leste.

"Kona-ba atu muda estatutu eskola Filial ida ne'e Governu ne’e remeta sei esforsu muda estatu Eskola Sekundária Jerál Públika Serankotek Suai Filial Salele ida ne’e, tanba haree ba kooperasaun profesór no inan-aman la'o di'ak. Kona-ba mobiliáriu hanesan kadeira no meza Ministériu Edukasaun sei oferese tuir kbi'it ne'ebé iha.

Governante ne’e mós hateten, Lideransa tenki iha jestaun di'ak, kontrola eskola sira ho di'ak nune’e bele organiza di'ak eskola. Ohin mai iha fatin ida ne'e ha'u haree imi organiza ho di'ak ambiente mós, kapás tebetebes. Profesór sira iha eskola tenki utiliza ona ekipamentu PowerPoint durante prosesu aprendizajen iha eskola, tanba agora ne’e mundu teknolójia.

Hafoin halo vizita ba eskola sira Sua Exelénsia ho ekipa partisipa mós iha Kurida kuda ne’ebé hala'o iha Postu Administrativu Suai Villa, Munisípiu Covalima. Antes ne’e mós Sua exelénsia Sekretáriu Estadu hala'o observasaun mós ba konstrusaun edifísiu eskola Sekundária Jerál Filial Fernando Lasama Ainaro.

#MédiaME