Ainaro, loron 16 fulan Maio 2025- Sua Exelénsia Ministru Edukasaun Interinu Sr. Domingos Lopes Lemos hamutuk ho Diretór Jerál Dezenvolvimentu Lokál Sr. Virgilio da Costa no Autoridade lokál Suku Cassa nian inagura projetu Programa Nasionál Dezenvolvimentu Suku (PNDS) siklu 5 konstrusaun hari'i sala tolu iha eskola Sekundáriu Jerál Paralelo Fernando Lasama de Araújo Ainaro Cassa, sesta-feira ne’e.
Iha intervensaun Sua Exelénsia Ministru Edukasaun Interinu Sr.Domingos Lopes Lemos, hateten, ohin inagura edifísiu ida ne’e bele venefisia di'ak liután estudante Cassa sira, husu estudante labele hakerek iha paredi eskola nian, obra ne'ebé mak ohin entrega ne'e eskola no profesór sira nian presiza kuidadu ho ambiente ne'ebé mós.
"Estudante mai iha eskola atu aprende profesór sira mak sai hanesan espellu ba estudante no inan-aman sira hatudu karaktér ne'ebé di'ak hanesan manorin-na’in.
Fatin hanesan Diretór Jerál Dezenvolvimentu Lokál Sr. Virgilio da Costa, deklara komitmentu estadu liuhusi Governu anteriór dekretu lei Nú.8 agora alterasaun ba dekretu lei Nú. 2/2024 ba programa PNDS ne’e klaru, alterasaun ne’e signifikadu atu hadi'ak tan, komitmentu estadu liuhusi programa Dezenvolvimentu Suku ne’e kontinuasaun reforsa oinsá mak Dezenvolvimentu Suku ne’e la'o di'ak.
Reprezentante Sekretáriu Estadu Dezemvolvimentu Lokál ne’e hateten, Programa Dezenvolvimentu Suku ne’e la'ós ba eskola de'it maibé, ba iha área hotu-hotu. Lideransa komunitariu sira liuhusi Konsellu suku presiza iha planu ida ne'ebé di'ak hodi identifika ba nesesidade Suku nian.
Responsável eskola Sekundáriu Jerál Paralelo Ainaro Cassa Sr. Alexandre Bianco, dehan, hanesan Suku Cassa oan kontenti tebetebes tanba Cassa bele hetan edifísiu foun ho sala tolu husi PNDS Suku Cassa nian ne'ebé hakarak oan sira iha Suku Cassa halo prosesu aprendizajen ho di'ak no dignu iha fatin ida ne'e. Fatin ida ne'e fó espasu di'ak ona ba Profesór atu bele hanorin ho vontade di’ak estudante mós aprende ho vontade di’ak.
Estudante Ensinu Sekundáriu Jerál Fernando Lasama de Araújo Cassa hamutuk na'in 228. Projetu Programa Nasionál Dezenvolvimentu Suku siklu 5 konstrusaun hari'i sala tolu ne’e orsamentu hamutuk 41 mil.
#MédiaME
