𝗟𝗘𝗜 𝗕𝗔𝗭𝗘 𝗘𝗗𝗨𝗞𝗔𝗦𝗔𝗨𝗡 𝗣𝗔𝗦𝗔 𝗜𝗛𝗔 𝗗𝗘𝗕𝗔𝗧𝗘 𝗝𝗘𝗡𝗘𝗥𝗔𝗟𝗜𝗗𝗔𝗗𝗘

𝐃í𝐥𝐢, 𝟎𝟗 𝐉𝐮ñ𝐮 𝟐𝟎𝟐𝟓 – 𝐃𝐢𝐬𝐤𝐮𝐬𝐚𝐮𝐧 𝐧𝐨 𝐯𝐨𝐭𝐚𝐬𝐚𝐮𝐧 𝐢𝐡𝐚 𝐣𝐞𝐧𝐞𝐫𝐚𝐥𝐢𝐝𝐚𝐝𝐞 𝐛𝐚 𝐏𝐫𝐨𝐣𝐞𝐭𝐮 𝐋𝐞𝐢 𝐍𝐨. 𝟖/𝐕𝐈 (𝟐.𝐚) 𝐋𝐞𝐢 𝐁𝐚𝐳𝐞 𝐄𝐝𝐮𝐤𝐚𝐬𝐚𝐮𝐧 𝐏𝐫é-𝐞𝐬𝐤𝐨𝐥á𝐫, 𝐄𝐧𝐬𝐢𝐧𝐮 𝐁á𝐳𝐢𝐤𝐮, 𝐄𝐧𝐬𝐢𝐧𝐮 𝐒𝐞𝐤𝐮𝐧𝐝á𝐫𝐢𝐮, 𝐌𝐨𝐝𝐚𝐥𝐢𝐝𝐚𝐝𝐞 𝐄𝐬𝐩𝐞𝐬𝐢á𝐥 𝐄𝐝𝐮𝐤𝐚𝐬𝐚𝐮𝐧 𝐄𝐬𝐤𝐨𝐥á𝐫, 𝐄𝐝𝐮𝐤𝐚𝐬𝐚𝐮𝐧 𝐄𝐬𝐭𝐫𝐚 𝐞𝐬𝐤𝐨𝐥á𝐫 𝐧𝐨 𝐅𝐨𝐫𝐦𝐚𝐬𝐚𝐮𝐧 𝐏𝐫𝐨𝐟𝐢𝐬𝐢𝐨𝐧á𝐥 𝐧𝐨 𝐫𝐞𝐯𝐨𝐠𝐚 𝐋𝐞𝐢 𝐍.𝟎 𝟏𝟒/ 𝟐𝟎𝟎𝟖, 𝟐𝟗 𝐨𝐮𝐭𝐮𝐛𝐫𝐮, 𝐋𝐞𝐢 𝐁𝐚𝐳𝐞 𝐄𝐝𝐮𝐤𝐚𝐬𝐚𝐮𝐧, 𝐩𝐚𝐬𝐚 𝐡𝐨 𝐯𝐨𝐭𝐮 𝐚𝐟𝐚𝐯ó𝐫 𝟑𝟕, 𝐊𝐨𝐧𝐭𝐫𝐚 𝟎 𝐧𝐨 𝐚𝐛𝐬𝐭𝐞𝐧𝐬𝐚𝐮𝐧 𝟏𝟓.

Projetu Lei ne’e iha objetivu atu atualiza no hadi’a baze edukasaun Timor-Leste nian, liuliu kona-ba edukasaun pré-eskolár, Ensinu Báziku no Ensinu Sekundáriu, Edukasaun Estra-eskolár no Formasaun Profisionál, nesesidade atu halo atualizasaun ho razaun tuir mai:

1. Aliñamentu ho ensinu superiór, tanba aprova ona Lei Baze ba Ensinu Superiór, hodi presiza garante koerente husi nível ensinu hotu no kria sistema edukativu ida ne’ebé bele integradu no artikuladu husi labarik ki’ik to’o universidade.

2. Moderniza Lei. Lei Baze Edukasaun, Lei N.0 14/2008, 29 outubru, Lei Baze Edukasaun, ohin loron la atualiza ona no la reflete realidade eskola nian.

3. Partisipasaun komunidade edukativa. Projetu ne’e rezulta, husi prosesu konsulta públiku luan, ne’ebé envolve diretór eskola sira, profesór sira, sindikatu no ajente edukativu sira seluk. Kontribuisaun sira ne’ebé rekolla, permite identifika problema prátiku norma sira ne’ebé la atualiza no lakuna legál ne’ebé konsidera ona iha elaborasaun projetu ne’e. prosesu ne’e garante katak Lei ne’e besik liu ba nesesidade loloos sistema edukativu nian.

4. Razaun adaptasaun ba realidade nasionál. Lei foun ne’e mantein pontu pozitivu husi lejislasaun anteriór, maibé inklui medida foun bazeia ba observasaun sira ne’ebé halo durante fiskalizasaun parlamentári. Alterasaun sira ne’e ho objetivu atu harii Lei ne’ebé efikásia liu no adekuadu ba realidade nasaun nian.

5. Urjénsia ba revizaun ne’e labele dúvida. Mantein Lei atuál signifika atu kontinua halo desigualidade no sistema ne’ebé limita de’it dezenvolvimentu estudante sira no la motiva profesór sira. Lei ne’e fundamentál atu garante sistema edukativu ida ne’ebé iha kualidade, justu no ekuitativu. Projetu Lei ne’e la’os inisiativa lejislativa de’it, maibé konstitui mós investimentu pedagójiku sosiál no estratéjiku. Ninia aprovasaun reprezenta pasu signifikativu iha garantia ba sistema edukativu ne’ebé inkluzivu, efisiente no preparadu ba dezafiu sékulu 21 nian.

Diskusaun no votasaun iha jeneralidade ba Projetu Lei N.0 8/VI (2.a) Lei Baze Edukasaun ne’e, partisipa mós husi Sua Exelénsa Ministra Edukasaun, Dra. Dulce de Jesus Soares, Vise-Ministru ba Asuntu Parlamentár, Dr. Aderito Hugo da Costa, inklui dirijente sira husi Ministériu Edukasaun.

#JornalistaPaulaDelgado
#MédiaME