Covalima, 19 Novembro 2024
Ministériu Edukasaun liu husi Diretór Nasionál Edukasaun Pré-Eskolár (DNEPE) Sr. Domingos Belo Soares ho ekipa DNEPE no HANDS, superintendente Munisípiu Covalima Sr. Jacinto do Carmo no koordenador eskola sira abertura workshop kona-ba programa intensivu iha salaun edukasaun munisípiu Covalima, Tersa-feira ne'e.
Iha intervensaun Diretor Nasionál DNEPE Sr. Domingos Belo Soares hateten objetivu ba loron ida ohin atu haree no rona informasaun kona-ba importánsia edukasaun sedu ba labarik, tanba hatene ona katak edukasaun sedu ba labarik. Maibé labarik ida ne'ebé ita atu fó edukasaun no edukasaun ida ne'ebé ita ko’alia formalmente ba Pré-Eskolár hahú husi tinan tolu (3) to'o mai tinan neen (6) ida ne'e mak importánsia no ita bolu edukasaun sedu.
“Agora dadaun polítika IX Governu Konstitusional mos ko'alia kona-ba importánsia ba Edukasaun Pré-Eskolár, tau prioridade ba labarik sira husi tinan tolu (3) mai to'o tinan neen (6) atu bele asesu ba Pré-Eskolár, husi Prezidente Repúblika mós publika hela ninia planu prioridade ba mós pre-eskolar" Dehan Diretór DNEPE.
Diretór DNEPE Sr. Domingos Belo Soares akresenta, edukasaun ita presiza tau importánsia tanba ita nia polítika hakarak hasa'e mós taxa matríkula, partisipasaun ba edukasaun labarik sira asesu ba Pré-Eskolár no mós asesu ba Ensinu Báziku. Maibé Iha ita nia Planu Estratéjiku Dezenvolvimentu Nasionál 2024 to'o 2030 ita tenki atinji 80% tanba ida ne'e mak agora dadaun ita servisu maka'as hela oinsá mak bele dezenvolve no akumula labarik sira hodi bele aumenta tan taxa matríkula.
Iha sorin seluk superintendente Munisípiu Covalima Sr. Jacinto do Carmo dehan "programa intensivu, ba ema ida ne'ebé la asesu ba Edukasaun Pré-Eskolár, programa husi Ministériu Edukasaun programa ida ne'ebé diak tebes mai ita, oinsá Diretór Eskola no koordenadór sira hamutuk ho inan-aman fó motivasaun ba ita nia oan sira ne'ebé la asesu ba iha edukasaun no lori importante ba futuru oan sira nian"
Iha abertura workshop kona-ba programa intensivu ne'e, Diretór eskola no koordenadór sira iha Ministériu Edukasaun Munisípiu Covalima.
#MediaME
