Díli – Loron Tersa-Feira, 29 Outubru 2024
Sua Exelénsia Ministra Edukasaun Dra. Dulce de Jesus Soares hamutuk ho Diretora SEAMEO, Dra. Habibah Abdul Rahim no UNICEF, halo lansamentu ba relatóriu jerál kona-ba uzu teknolojia iha edukasaun Sudoeste Asiátiku, hodi fasilita estudante sira partisipa iha prosesu aprendizajen ho di’ak liután.
Iha entrevista, Sua Exelénsia Ministra Edukasaun Dra. Dulce de Jesus Soares, dehan, iha relatóriu ne’e hateten, Timor-Leste mós la atrazadu liu, tanba uza ona teknolojia hahú iha momentu Covid, hahú ona programa “Eskola Ba Uma”, “Eskola Iha Uma” no mós instala ona ínternet iha Eskola Sekundáriu, Ensinu Báziku balun iha tinan 2023”, dehan S.E. Ministra Edukasaun.
“INFORDEPE mós hahú dadauk ona uza teknolojia iha enkontru no mós formasaun professores liuhusi e-learning, ne’ebé mak professores hotu-hotu la presiza tún mai Dili, maibé partisipa de’it iha sira-nia fatin liuhusi tableta ne’ebé fahe ona ba professores sira.
Governante ne’e hatutan, iha relatóriu mós hateten, teknolojia ne’e la troka prosesu aprendizajen normál, maibé uza teknolojia hodi ajuda iha parte balun, liuhusi maneira ne’ebé iha hodi reforsa nafatin kualidade edukasaun iha Timor-Leste.
#MédiaME
