Dili, 22 Abríl 2026
Ministériu Edukasaun, liuhusi Komisaun Nasional Timor-Leste ba UNESCO (CN-UNESCO) nomeia Grupu Estudante Nain 8 hodi partisipa iha International Creativity and Innovation Award (ICIA) 2026 iha nasaun Cambodia tersa-feira ne'e.
Estudante sira ne’ebe ba tuir eventu ne'e, kompostu husi grupu 5 husi Ensinu Báziku siklu datoluk no grupu 5 husi Ensinu Sekundáriu, mak hanesan EBC Santo Antonio Teulale, Baucau , EBC 1, 2, 3 Dom Baumeta Suco Liurai, Aileu, EBC Siklu 3 Fatumeta, Dili, ESG 4 De Setembro - Viqueque, ESGP - FINANTIL Dili no ESGP Nu. 1 de Liquiça.
Estudante Engel dias Costa Delarosa reprezenta EBC Santo Antonio Teulale, Baucau dehan sente kontente tebes tanba bele partisipa iha eventu internasional ne'ebé ho nia tema Creativity and Innovation Award (ICIA) iha tinan 2026.
" Ami husi eskola EBC Santo Antonio Teulale, Baucau sei hodi topiku Estatistika resiklazen espesialmente ba moda media no mediana ne'ebé ami uza mak hanesan resiklazen sira " dehan estudante ne'e iha aeroportu internasionál Presidente Nicolau Lobato Dili.
Iha fatin hanesan estudante Deolindo Bileki reprezenta Munisípiu Aileu dehan sente haksolok tebes tanba bele partisipa iha kompetisaun internasional ida-ne'e, tanba durante fulan 3 nia laran sira prepara ho di'ak tebes.
Libania Domingas Ximenes hanesan fomadora Siénsia no Matematika akresenta, eventu ne'e fó oportunidade ba estudante sira husi siklu datoluk, Ensinu Sekundáriu to'o Universidade, inklui foin sa'e profisionál sira atu hatudu sira nia projetu ne'ebé bele fó solusaun ba dezafiu mundiál nian.
Tema ba tinan 2026 nian mak alinamentu ho objetivu dezenvolvimentu sustentavel ICIA husi nasaun unidas hodi haforsa inovasaun foin sa'e ba futuru sustentavel.
Fomadora ne'e subliña, Objetivu prinsipál mak hanesan, primeiru haburas inovasaun, inspira foin sa'e sira atu haforsa kreatividade no sai foin sa'e inovador, solusaun sustentavel, dezenvolve skil hodi haforsa abilidade iha Lideransa, problem Solving, communication no network globál katak dalan nakloke ba estudante no manorin sira atu halo ligasaun ho parseria internasionál.
Atividade International Creativity and Innovation Award ne’e hala’o iha formatu rua, mak liu husi online, ne’ebé hala’o ona iha loron 11 Abril 2026 no in-person ne’ebé sei hala’o iha loron 24-26 Abril 2026 iha Kambodia.
Grupu ne’ebé reprezenta Timor-Leste hodi partisipa direta ICIA iha Cambodia, mai husi Eskola EBC Santo António Teulale, Baucau hamutuk grupu 2 no grupu ida husi EBC Dom Baumeta, Aileu. Grupu estudante husi EBC Santo Antonio Teulale hamutuk ema nain 6, Mane 1 no Feto 5. Grupu estudante husi EBC Dom Baumeta hamutuk ema nain 2, mane 1 no feto 1.
#MédiaME
#Siga&Reis
