Ermera, loron 29 fulan Agusto 2024
Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos akompaña husi Diretór Edukasaun Munisípiu Ermera, hamutuk ho Administradór Postu Administrativu Hatulia B entrega kadeira no meza ho unidade 90 ba eskola Tékniku Vokasionál (ESTV) Cabo Martinho Guissarudo Iha Postu Administrativu Hatulia B, Munisípiu Ermera kinta-feira ne’e.
Iha Intervensaun Sua Exelénsia Sekretáriu Estadu ESJ-ESTV Sr.Domingos Lopes Lemos hateten, Ekipamentu kadeira no meza ne'ebé ohin ekipa lori mai entrega iha eskola, husu eskola ESTV atu uza ho kuidadu durante prosesu aprendizajen.
"Ohin Ami mai entrega de'it, responsabilidade boot ba eskola atu kuidadu sasan sira ne'e durante hala'o prosesu aprendizajen, husu profesór/a sira atu hanorin estudante ho di'ak hanesan ema manorin-na’in hodi kontribui ba Ermera oan sira".
Ministériu Edukasaun iha planu atu halo investamentu ba eskola Téknika Vokasionál no Ensinu Sekundáriu Jerál iha futuru liuliu ekipamentu prátika nian.
Diretór Eskola Sekundáriu Tékniku Vokasionál Guissarudo Sr. Marito dos Santos Orgullu tebetebes tanba Ministériu Edukasaun liuhusi Sekretáriu Estadu ESJ-ESTV oferese ona kadeira no meza mai eskola ida ne’e hanesan tulun ida ba estudante sira atu uza durante prosesu aprendizajen.
Eskola Sekundáriu Tékniku Vokasionál (ESTV) Guissarudo Hatulia B estudante hamutuk na'in 197, kompostu husi Departamentu Agrikola no Komérsiu.
MédiaME
