*VIQUEQE, 23 JULLU 2026* – Formadór Nasionál no Munisipál hosi Institutu Nasionál Formasaun Dosente no Profisionál Edukasaun (INFORDEPE), hamutuk ho formandu sira, hala’o prátika simulasaun ba disiplina Siénsias Naturais, Edukasaun Arte no Kultura, no Língua Inglés ba Klase 8 iha Munisípiu Viqueque ho susesu.
Prátika ne’e la’o ho di’ak tanba formandu sira konsege implementa tuir planu ne’ebé prepara ona.
Formadór Munisipál, Julião da Silva, hatete katak Kurríkulu Foun lori mudansa boot ba prosesu aprendizajen. Iha modelu foun ne’e, estudante sira maka sai sentru no ativamente esplora matéria iha sala laran.
_“Kurríkulu foun ne’e diferente tebes. Manorin sira fó de’it instrusaun, no estudante sira maka esplora liuhosi prátika ne’ebé barak liu,”_ nia esplika.
Iha fatin hanesan, formandu Jacinto Gonzaga da Costa haktuir katak atividade ne’e fó esperiénsia foun liuhosi eksperimentu simples.
_“Ami hetan esperiénsia foun liuhosi prátika no halo eksperimentu simples, hodi diskute no halo konkluzaun ba situasaun moris real nian,”_ formandu ne’e konta tuir.
Atividade ne’e remata ho diskusaun grupu no aprezentasaun. Ida-ne’e sai sinál katak formasaun simulasaun ne’e hala’o ho susesu.
#MediaME
#EmiliodaCruzLopes
