*DILI, KINTA-FEIRA, 23 JULLU 2026* – Ministériu Edukasaun hamutuk ho Institutu Nasionál Formasaun Dosente no Profisionál Edukasaun (INFORDEPE) kontinua fó formasaun, liu-liu ba prátika simulasaun hanorin iha sala laran ho utiliza metodolojia demonstrasaun.
Iha prátika loron daruak ne’e, estudante sira mai husi Eskola Ensinu Báziku Sentrál (EBC) Sérgio Vieira de Mello, EBC Esperança da Pátria, no EBC Bidau Akadiruhun.
Formadór ba disiplina Edukasaun Fízika no Desportu, António Amado da Cruz, hatete iha fatin formasaun ESGP 4 de Setembro UNAMET, Díli, katak formasaun ne’e nia konteúdu maka Prátika Simulasaun ne’ebé realiza rasik husi formandu sira.
_“Iha formasaun ida-ne’e, formandu sira mak realiza rasik prátika simulasaun hodi utiliza metodolojia ensinu demonstrasaun nian ba estudante sira iha sala laran,”_ nia dehan.
Nia esplika tan katak prátika ida-ne’e foka ba disiplina 3 ne’ebé aprende ona iha loron dahuluk, hanesan: *Matemátika, Saúde no Bem-estar, no Edukasaun Fízika no Desportu*. Rezultadu hatudu katak estudante sira partisipa másimu tebes kompara ho kurrikulu tuan.
Aleinde ne’e, partisipante husi Eskola Báziku Filiál (EBF) Mulial Fatunaba, Profesór Samuel Ribeiro, fortifika katak durante loron rua nia laran, sira aprende kona-ba metodolojia hanorin sékulu XXI nian ba disiplina Edukasaun Fízika, no mós aprende modalidade foun ida ho naran *NETBALL*.
_“Benefísiu boot ba ami hanesan partisipante maka oinsá ami bele aprende hamutuk kona-ba kurrikulu foun atu nune’e ami bele adopta ba estudante sira iha disiplina hotu. Ida-ne’e mós atu fó boa-vontade no espíritu aten brani ba estudante sira atu esplora no fahe sira-nia matenek no esperiénsia iha prosesu aprendizajen nia laran, no hetan futuru ne’ebé di’ak liután,”_ nia tenik.
#MediaME
#LuciaAlves
